Mizoramah sawrkar apiangin ngaih pawimawh leh hmalak nasat tumna bik an nei vek a, sawrkar kalta ah khan an flagship programme chu NLUP a ni a. Tuna sawrkar mek MNF te ngaih pawimawh ber chu Socio-Economic Development Policy a ni thung.

Socio-Economic Development Policy (SEDP) ah hmalak chak anih theihnan Board hrang hrang 14 siam a niin heng Board ah te hian Minister te chu chairman niin Vice Chairman ah hian MLA te, Ex MLA te dah an ni a. An office tur pawh Chief Minister chuan a hawng ta a, a takin hna an thawk thuai turah beisei ang.

SEDP Board chungchangah hian Chief Minister chuan Mizoram chu hmasawnna kawng hrang hrang ei leh barah te, mipui nunphungah leh hmasawnna policy kalphungah te India hmarchhaka hmahruaitu a dah chu sawrkarin a tum thu a sawi a. Chumi atan chuan SEDP chu siamin, policy tipuitling tura hma la turin Board 14 te chu din an nih thu a sawi a ni. Chief Minister sawi anga sawrkar tha tichak tura heng board te hi din an nih chuan hmalakna pawh a chak sawt a beiseiawm a ni.

Chutih rual erawh chuan board thuneihna leh hmalakna tur fel taka duan a nih loh chuan Minister leh Board inkarah te, Department leh Board inkarah te harsatna a awm thei a. Chuvangin board thuneihna chin leh an hnathawh tur te rel fel sak hmasak theih nise harsatna thleng thei nasa taka pumpelhna a ni dawn a, chuvangin sawrkar hian ruahmanna siam lawk thei se thil duhawm tak a ni.

Tuna SEDP Board 14 te bakah hian sawrkar hian Corporation hrang hrang ah Chairman engemaw zat a dah bawk a. Heng ho zawng zawng hlawh leh inenkawlna hi a hautak hle ang tih a hriat a. Hei mai bakah board/corporation hrang hrangah te hian member engemaw zat ruat an ni bawk a. Board hrang hrang te hian sawrkar tha ti chak zawng leh ram hmasawn zawnga hna an thawh chuan Mizoram dinhmun nasa taka chawikang tu an ni dawn a. Board te hi engemaw politics thila nihna inbelna leh intuam damna mai mai hmanrua an nih erawh chuan tul lova sawrkar sum tam tak senralna a ni thung dawn a ni.