Aizawl; Kum 2022-23, Academic session chhung atan Mizoram sawrkar flagship programme SEDP atangin Primary - High school a thawk tur mi 500 bawr vel rawih an ni dawn a, hei hian school a thawktu indaihlohna nasa takin a tihziaawm beisei a ni.

Human Resource Development (HRD) Board vice chairman L. Thangmawia hnen atanga ZALEN thudawn danin, Mizoram hmun hrang hrangah zirtirtu pension a chhuak an tam avangin indaihlohna a nasa a, hemi vang hian tun academic session chhung atan primary, middle leh high school a thawk tur SEDP atangin mi 500 bawr vel rawih an ni dawn a, chung zinga mi 20 bawr vel te chu IV grade leh LDC an ni a, LDC te hi exam centre a LDC neilo school a awm tur an ni.

Rawtna awm ah chuan primary school zirtirtu te chu Rs. 10,000, middle Rs. 13,000 leh high school zirtirtu ten Rs. 15,000 an hlawh dawn a, kum khat atan rawih an ni ang. L. Thangmawia sawi danin, SEDP atangin Grand-in-aid in school an pe ang a, school ten an mamawh ber zirtirtu hlawhah an lo hmang dawn a ni.

HRD Board vice chairman chuan tuna an hmalakna kal mek chu tihtawp a nih a, zirtirtu dang lak belh an nih loh bawk chuan Mizoram a school 300 bawr velin nasa takin an tuar thei dawn niin a sawi.

SEDP hnuaia thawk turin a khaw mi, tlawmngai thei tur lak an ni a, nikum lam khan High school zirtirtu mi 157 rawih an lo ni tawh bawk.