Aizawl: Chief Minister leh MNF President ni bawk Zoramthanga chuan, "Chhungkaw 60000 hnena SEDP ṭanpuina kan pek pawh, second installment kan pe leh thuai dawn a. Sawrkar kum tharah hian chhungkaw sing tel a tharin kan pe leh dawn bawk a ni," a ti.

Hachhek Joint MNF Block Conference Zirtawpni a neih a hmanpuina ah he thu hi sawiin Zoramthanga chuan, "MNF party hian harsatna tam tak tawk ṭhin mahse, Pathianin hun a tih ah a khaichhuak ṭhin,"a ti a. Congress chungchang sawiin, "Delhi lama khawnvartui bur a buak tawh avangin, a phita a rawp ral mek a, Mizoram ah pawh a rawp ral mek a, beisei tur an awm tawh lo," a ti a. "ZPM te pawh a tirah party kan nilo, movement kan ni e, tiin an inzuar a. Nula thianghlim kan ni e, min ngaizawng rawh u, tiin an inzuara tunah chuan an nihna langin an naupai a puar ul tawh a. An inzawrh ang an nilo a, kan hrechiang zel a, beisei tur an awm lo a ni," a ti bawk.

MNF thuchhuah tarlan danin  Zoramthanga hian MNF party zawm thar mi 881 a lawmlut.