Aizawl August 19, 2022 : Chief Minister Zoramthanga, SEDP Governing Board Chairman ni bawk chuan vawiin khan Vanapa Hall-ah Mizoram Sawrkar Flagship Programme – Socio Economic Development Policy hnuaia mimal chhungkua hmasawnna leh an eizawnna tinzawn a eizawnna ngelghet an neihna tur Family Oriented SEDP hawnna programme chu khuallian niin a hmanpui.

Chief Minister Zoramthanga chuan, "Hripuiin Mizoram tiamin khawvel pum kum hnih chhung a tihbuai leh a tuam avangin SEDP pawh hi a pangngai anga kal chhohpui a harsa chungin Sawrkar chuan SEDP hi kan sum dinhmun ngaihtuah chungin a theih ang angin kan tlin chin angin kalpui kan rel. Sum leh pai dinhmunin a zir loh avangin a tira SEDP duan ang leh duhthusam anga kalpui chu a theih dawn lo a, amaherawhchu engemaw zat chu Sawrkarin a ti thei dawn a. Chumi bultan nan Mizoram pumah tun Sawrkar kum chhungin chhungkaw 60,000 chu a target a, cheng 50,000 theuh pek a ni dawn a, hei hi a kumkhatna atana kan bultanna a ni tih hi kan hriat a ngai a. Hei hi a tawpna a ni lova, SEDP in a target kha chu chhungkaw tin tan nuai 3 a la ni a, ala kal zel dawn a ni," a ti. 

SEDP target tih hlawhtlin a beisei thu sawiin, "Sawrkar sum dinhmun a that leh zual hunah SEDP in chhungkaw tin tana target chu tihhlawhtlin ngei ka beisei. Politics ah chuan inbeihna te, insawiselna te chu a awm lo thei lo," tiin, "Heng insawiselna te hi democracy tithianghlimtu a ni," a ti bawk. Covid hripui avangin Sawrkarin sum a dawn tur a dawn tak loh, a hloh chu cheng vaibelchhe 3000 vel a nih thu tarlangin Sawrkarin kum 2022-2023 chhungin Family Oriented SEDP atan vaibelchhe 300 dah a nih thu a sawi bawk. 

Chief Minister hian a Ist Instalment atana beneficiary tin te pek tur sum chu a hlawmin Line Department 9 te hnenah a cheque in a hlan a. Agriculture Department chu cheng 23,36,05,500 cheque hlan niin Department hnuaia beneficiary 9161 an awm dawn a; Animal Husbandry & Veterinary Department chu cheng 64,76,74,500 cheque hlan niin Department hnuaiah beneficiary 25,399 an awm dawn a ; Commerce & Industries Department chu cheng 33,82,83,000 cheque hlan niin Department hnuaiah beneficiary 13,266 an awm dawn a; Fisheries Department chu cheng 3,21,55,500 cheque hlan niin cheque hlan niin Department hnuaiah beneficiary 1261 an awm dawn a; Horticulture Department chu cheng 10,39,89,000 cheque hlan niin Department hnuaiah beneficiary 4078 an awm dawn a; Land Resources, Soil & Water Conservation Department chu cheng 14,48,40,000 cheque hlan niin Department hnuaiah beneficiary 5680 an awm dawn a; Sericulture Department chu cheng 76,50,000 cheque hlan niin Department hnuaiah beneficiary 300 an awm dawn a; Tourism Department chu cheng 6,63,000 cheque hlan niin Department hnuaiah beneficiary 26 an awm dawn a leh Urban Development & Poverty Alleviation Department chu cheng 2,11,14,000 cheque cheque hlan niin Department hnuaiah beneficiary 828 an awm dawn a ni. 

Programme kaihruaitu Deputy Chief Minister Tawnluia, Vice Chairman SEDP Governing Board Vice Chairman ni bawk chuan SEDP duanchhuah dan te, SEDP thil tum te, SEDP kalpui nana ruahmanna hrang hrang siamte, an kenkawh dan tur te chu chipchhiar takin a sawi a. SEDP chu Mizoram chakna leh theihna te zirchianga, mipui ngaihtuah leh sukthlek te mila duan a nih thu sawiin Mizoram intodelhna leh hmasawnna tur atan rahbi pawimawh tak a nih thu a sawilang bawk.  Deputy Chief  Minister hian District 11 a SEDP kalpuina atana DC tin atana SEDP sum ruahman chu cheque in a hlan a ni. 

Lalmalsawmna Pachuau, Secretary Planning & Programme Implementation Department leh Member Secretary SEDP Executive Board chuan Family Oriented SEDP hnuaia beneficiary thlan dan te, beneficiary zat te, Trade hrang hrang leh a kengkawh tur Line Department te, thlen chin te, hmachhawp hnaivai leh hmachhawp dangte, endikna kalpui dan te tarlangin Technical Report a hnen atangin ngaihthlak a ni a. H. Rammawi, Vice Chairman, Mizoram State Planning Board leh Vice Chairman, SEDP Executive Board chuan lawmthu sawiin hun  a khar a ni. 

Family Oriented Socio-economic Development Policy (SEDP) in a tum bulpui ber chu mahnia eizawnna (self employment leh kut hnathawh) bultan na atan leh chutiang eizawnna kalpui mekten hma an sawn zel nana an hman tur tanpuina pek leh Mizoram chhunga mimal leh chhungkua, a tam thei ang ber, dimhmun tha zawka hlankai a ni.

‘Family Oriented’ a nih angin tanpuina hi chhungkua anga dawn tur a ni a, chhungkaw pakhat atangin beneficiary pakhat chauh pek a ni dawn a. Agriculture, Horticulture, Animal Husbandry & Veterinary, Fisheries, Sericulture, Land Resources, Soil & Water Conservation, Commerce & Industries, Urban Development & Poverty Alleviation leh Tourism Department te hnuaiah hian trade items 70 chuang (eizawnna kalpui tur) thlan a ni.

Family Oriented thawh khatna (Phase-1) ah hian chhungkaw 60,000 huam turin MLA Constituency tinah chhungkaw 1500 theuh thlan an ni a, tanpuina hi a chunga tarlan Department te kaltlang hian thawh hnih in sem chhuah tur a ni a. Hemi ni hian a thawh khatna atana Department ten an sem chhuah turin vawiin khan cheque hlan an ni.