ZALEN September 19, 2023 : Mim Kut chungchanga State Level Steering Committee chu vawiin khan an Chairman Social Welfare & Tribal Affairs Minister Er. Lalrinawma hovin an thukhawm a, Mim Kut hmandan tur an rel. Mizote Kut chi thum - Mim Kut, Pawl Kut leh Chapchar Kut te zinga hman lar tawh loh ‘Mim Kut’ chu Nodal Department Social Welfare & Tribal Affairs Department kaltlangin a tum khatna atan September 29, 2023-ah Vanapa Hall, Aizawl-ah hman a ni ang.

Mim Kut ni hian chhungtin ten an hmangaih kal tate puala chawhlui kil, thlan tihfai, pangpar dah, thlan ram tawh cheithat leh midang harsa zawkte tan luanchhuaha malsawmna ni anga hmang turin an ngen a. State Level Steering Committee ngenna angin MIMA te anmahni dawrtute chu ‘Mim Kut discount’ an pe dawn a ni. He ni pual hian Riangvaite Thlanmual, Zemabawk chu tihfai leh cheithat tura rel a ni bawk. Mim Kut hman ni hian sawrkar hnathawk te pawh an pisa kainaah Mizo inthuam bel tura tih an ni.

State Level Steering Committee on Mim Kut-ah hian Social Welfare & Tribal Affairs Department bakah Mizoram sawrkar department hrang hrang - Art & Culture, Higher & Technical Education, School Education, Information & Public Relations, Tourism Department te leh NGO hrang hrang - YMA, MUP, MHIP leh MCO te an tel a ni. Mim Kut hmandan chungchanga inkawmhona Local TV leh DDK ah te tihchhuah turin mithiam ten hun an hmang dawn a, mi zawng zawngin lo thlirsak turin Committee chuan a ngen nghal a. 

Mizo pi puten hringnun khawvel leh thlarau khawvel inzawm zia an hriat dan Mim Kut hian a tarlang chiang hle a. Vaimim seng zawh (September)-a hman Mim Kut hi mitthi ngaia tahna kut a ni. Mahse, kan pi leh pu ten damlai khawvel leh fam chang tawh khawvel inzawmna an hriat zia a tilang a. Chanchin Tha lo thleng tur atana buatsaihna leh temlawkna Kut hlu tak an lo hmang thin a ni. 

Kristianna Mizoram-ah a lo luh atangin Mizote nunphung leh chin than thil tam tak thiah sak a ni a, Mizo hmel leh nunphung a tidanglam nasa hle. Sakhaw thar Kristianna leh heng thil hluite hi inmil theiin an hre lova, chuvangin pipute thil lo chin than tam tak chu zawi zawiin a lo chuaiin thangtharte rilruah hmun a chang ta lo tial tial a. Mizo Kristiante zingah lehkhathiam leh mi vengva tak tak an lo awm chho ta zel a, Kristianten an lo hnawl tawh Kut pawhin lainattu leh hmangaihtu a nei chho ta zel a. Mizote zingah mahni hnam thila harh tharna (cultural revival) a lo thleng ta zel a, Mizo nunphung leh hnamzia mualliam tawha ngaihte nasa takin a rawn chawilar thar ta a. 

Heng zingah hian Mizoten Kut neih pathum zinga pakhat ‘Mim Kut’ pilbo tawha ngaih hnu chu kan Kristianna mil leh inhnerem zawnga hman atan Social Welfare & Tribal Affairs Department chuan Ministry of Tribal Affairs, Govt. of India atangin cheng nuai 20 hmuin kumin atangin ‘Mim Kut’ chu hman tan tum a ni ta a ni.

Meeting-ah hian ‘Mim Kut Logo’ siam intihsiaknaa lemziak thehlut 54-te chu uluk taka enfiah niin ‘Mim Kut Logo’ atan Jonathan Zorinpuia, Mizoram House, Vasant Vihar, New Delhi ziah chu thlan a ni ta a, hei hian lawmman sumfai cheng 10,000/- a keng tel a ni.