Aizawl September 8, 2023 : Vawiin khan Deputy Chief Minister, Tuichang AC bialtu ni bawk Tawnluia chuan Khawzawl Arro Venga District Research Office building thar chu a hawng. September thla chhung hian sem chhuah hman tum a nih thu a sawi.

Tawnluia chuan, District Research Office chu Mizoram sawrkara Department pawimawh tak Planning & Programme Implementation hnuaia awm a nih thu sawiin, department pawimawh tak, district-in a ken tel a ni a. District Research Office chu hna ropui tak thawktu, hmathlir thui tak sawrkarin a neih theihna hnar pawimawh a ni, a ti.

Deputy CM chuan, Mizoram sawrkarin mipuite hmasawnna ngaipawimawh mahse hripui leng vangin harsatna tam tak kan tawk a, sawrkar laipui atanga sum hmuh tur cheng vaibelchhe 3000 dawn a hmuh loh a ni a ti. Mipui ten anmahni kutkawih ngeia intodelhna kawng an zawh theihna tur sawrkar flagship program - ‘SEDP’ pawh hripui lengin tikhaihlak mah se, 1st phase-ah mi 60,000 kan tuam tawh a, 2nd phase-ah mi 60,000 bawk tuama September thla chhung hian sem chhuah hman tum a ni a ti. 

Khawzawl District Research Office hi September ni 12, 2022 khan sak tan a ni a, May ni 12, 2023 khan sak zawh a ni. Building hi cheng nuai 43 senga sak niin, chhawng hniha sang, square meter 227.43 a zau a ni a. Ground floor-ah hian - Staff Room, Video Conferencing Room, DRO Room leh Toilet te a awm a; first floor-ah hian DRO Quarter awmin choka, living room leh bedroom pahnih a awm a ni.