ZALEN September 9, 2023 : Zirtawp zana Hyve Studio, Tuikual-a Congress party-in mi thar an lawmluh zinga Serampore College Principal Dr. Vansanglura chuan Congress a zawm chhan chu Lal Isua chanchin tha la hre lo te hnena nasa zawka hril a nih theihna tura kawng sial a ngaih vang niin a sawi. 

Dr. Vansanglura chuan India zalenna sual chhuaktu party Congress a zawm chhan chu Lal Isua chanchin tha la hre lo te hnena nasa zawka hril a nih theihna tura kawng sial a ngaih vang a ni a, chutiang tur chuan Serampore College a thawkte pawh khawtlang leh ram siamthatna tura Politics tel phal sak an ni tih sawiin, William Carey-a thutthlenga thut leh ram leh hnam siamtha tura penchhuah chu a in mil tiin, ani pawh a hnung zui tura pen chhuak a nih thu a sawi.

Serampore College Principal chuan, "Tunah hian India ram leh Mizoram hian eng kawng nge kan zawh dawn tih zawhna hi kan in zawh a hun takzet tawh. Kan ram, kan hnam, kan sakhua hmalam hun thui tak hriltu tur Inthlan kan hmachhawn mek. Ral khata thlir mai mai a hun tawh lo. Sakhaw zalenna palzut a, Democracy lungphum pawimawh tak sawinghing tu, kan zalenna tih chhia a, kan sakhaw hmun tihchhetu leh kan hmun thianghlim ti bawrhbang a, kan unaute chunga rawva taka che Hindu lal ram tundin tuma BJP chakna chhu chat theitu chu Congress Party a ni," a ti. 

Dr. Vansanglura chuan, "Min nghaisatu leh min nekchep a, min chimral tumtu BJP lo thawhpui duhtu leh thawhpui tura thuthlung ziaktu an awm ta hi a pawi takzet a. BJP thawhpui leh pui loh tur chiang lo te chungah innghah ngam a ni loa, heng mite hnena risk lak loh a him ber. Hindu lal ram dintumtute thawhpui ve miah lo tur, BJP kan thawhpui dawn lo tia sawifiah fo ngai lo, Pu Lalsawta kaihhruai Congress kut tih chak hi kan ram, kan hnam leh kan sakhaw tan a tul takzet a ni," a ti bawk.