ZALEN Nov. 13, 2025 : Aizawl Bawngkawn Venglai-a cheng mi pakhat chu nimin khan a thlenna Serchhip-a hotel pakhatah thiin, nimin vek khan a ruang hi Aizawl-a an chenna ah lak nghal a ni.

Thu lakna Lenkawlin a tarlan danin, mitthi hi Lalmuanpuia (27) s/o Lalnunmawii, Bawngkawn Venglai niin he hotel-a a thlenpui leh nupui anga awmpui chuan tunkar Thawhtanni khan Thenzawl-a camping neih mekah lut turin an pahnih hian an kal tih a sawi a, amaherawh chu anmahni hi damdawi ti thin an nih avangin damdawi nghei tura harsatna nasa tak an neih avangin niminpiah (Thawhlehni) khan Camping atang hian chhuakin Serchhip-ah an chhoh thu a sawi a ni.

Serchhip-ah hian hmelhriat an neih loh avangin Serchhip Bazar-a hotel pakhatah thlengin zan-ah pawh an mu hlei thei tawh lo niin a sawi. Hetianga damdawi tih tur an neih loh avanga harsatna an tawh avang hian zing-ah a pasal hi hotel atanga chhuahsanin damdawi lei tur hi a zawng ta nia thudawn a ni a, damdawi lei tur a hmuh hnuah a pasal ko tura hotel lama mi a tirh chuan hotel enkawltute nen hian room chhunga a pasal thi-a lo awm chu an hmu ta nia thudawn a ni.

Hetiang thil a thleng tih hriat a nih veleh khawtlang hruaitute leh YMA hruaitu ten a tul ang ang buaipuiin Serchhip Police te pawh hriattir an ni a, Police te hian a tul ang buaipui nghalin nimin vek khan Serchhip damdawi In-ah a ruang hi Postmortem nghal a ni a, a kuang hi YMA ten tum sakin nimin tlai dar 3:15 vel khan Aizawl lamah a ruang hi lak nghal a ni.

#ZalenNews