June 22, 2023; National Highway-54 laih meka ram neitu thenkhat ten zangnadawmna an la lak loh avanga tunkar Thawhtanni atanga Serchhip by-pass Road laih mek-a kawngpui an dan chu District thuneitute nen inbiakna an neih hnuah nimin khan kawngpui dan hi tihtawp a ni. NH. 54 laih meka ram neitu thenkhat ten zangnadawmna an lak tur tihfel a la nih loh avanga tunkar Thawhtanni atanga NH. 54 Serchhip by-pass road an dan chungchang ah hian nimin chawhnu khan NHIDCL leh ram neitute hian Serchhip District Bawrhsap Nazuk Kumar IAS hovin Serchhip DC Meeting Room-ah inbiakna an nei a. He hunah hian ram neitu aiawhte chuan tunah hian zangnadawmna la tihfel mi 15 vel an intelkhawm thu sawiin, May 24, 2023-a Serchhip Addl. DC hova inbiakna an neih ah NHIDCL ten June 18, 2023 thleng ngaichang tura an tih anga an kawngpui dan an lo tihtawp thu leh an huntiam a ral hnuah pawh zangnadawmna hi tihfel ala nih loh avangin kawngpui hi dang leh an ni tih an sawi a ni. He hunah hian Bawrhsap chuan inbiakna hmasa neih hnua harsatna te sawiin, document tihfel ngai thenkhat NHIDCL in June 6-a an rawn thawn chu buaipui nghal a nih thu leh VC pass te pawh enfiah leh nghal niin June 19-ah an peihfel thu leh hei hi RO-ah thawnin tunah hian Delhi a thlen leh tawh thu a sawi a. Meeting neih a nih lai hian Bawrhsap chuan NHIDCL-a Executive Director chu Phone hmanga be nghalin, ani hian Pisa kai ni ni 10 lo awm leh tur chhunga an peihfel hman a beisei thu a lo hrilh a. Hei hi ram neitute nen an sawiho hnuah ram neitute chuan Pisa kai ni ni 10, July 7, 2023 thleng ngaihchan leh rem an ti a, hemi ang hian inremna siamin an kawngpui dan hi an titawp a ni. He huntiam chhunga an pawisa dawn tur hi tihfel a ni lo a nih erawh chuan ram neitute hian tul an tih anga kawngpui dan hi an kalpui leh tur thu pawh an inremna ah hian tarlan tel a ni bawk.