DOWNLOAD OUR APP

Read latest news on your phone
app-store

Serchhip District Hospital a hmun ngaia sa turin court-in thutlukna siam

Nov 23, 2022

Serchhip District Hospital sakna tur chungchanga Serchhip JAC te PIL thehluh chu Guwahati High Court, Mizoram Bench chuan nimin khan ngaihtuahin Scrutiny a paltlang a, Guwahati High Court-in PIL No.15 a pe a. Vawiin khan hemi chungchang hi ngaihtuah nghal a ni a, court chuan a hmun ngaia sak turin thu a ti tlu.

Aizawl November 23, 2022 : Serchhip District Hospital sakna tur chungchanga Serchhip JAC te PIL thehluh chu Guwahati High Court, Mizoram Bench chuan nimin khan ngaihtuahin Scrutiny a paltlang a, Guwahati High Court-in PIL No.15 a pe a. Vawiin khan hemi chungchang hi ngaihtuah nghal a ni a, court chuan a hmun ngaia sak turin thu a ti tlu.

JAC te PIL thehluh hi Guwahati High Court, Mizoram Bench-ah vawiin ni November 23, 2022 khan Judge 2 thutna Divisional Bench, Justice Nelson Sailo leh Justice Marli Vankung te hmaah ngaihtuah a ni a, Serchhip Dist. Hospital sakna tura Chief Minister hova May ni 27, 2022 a Memorandum of Understanding (MoU) ziah ah leh Hospital Detailed Project Report (DPR) ah a hmun ngaia sak tur tih a ni a, hemi tidanglama Bukpui-a sak tur ang zawng hian sawrkar-in Official a hmalakna a la nei lova, chuvangin a hmun ngaia Hospital hi sak ngei turah Court chuan a ngai tih an sawi. Sawrkar in MoU leh DPR ang lova hmundanga sak tuma hmalakna Official-a nei a nih chuan PIL thehlut nawn leh turin Serchhip JAC Ukil te zalenna (Liberty) a pe a ni.

Power Grid Corporation of India (Ltd) CSR Fund atangin Serchhip District Hospital sakna tur hian Rs.21 crores hmuh a ni a, hetihlai hian Serchhip Dist. NGO Co-Ordination Comtt. (NGOCC) ten Bukpui a sak an rawt thung. Mahse, September 26, 2022 a Serchhip DC hova Joint Action Committee on Serchhip District Hospital Site te leh Serchhip Dist. NGO Co-Ordination Comtt. te Joint Meeting ah JAC ten Detailed Project Report(DPR) leh May ni 27, 2022 a Chief Minister hova Power Grid Corporation of India Ltd. leh Health Deptt. hotu ten Memorandum of Understanding an ziah ah a hmun ngaia sak tura engkim ruahman a ni tih an sawifiah hnu ah NGOCC lam ten Bukpui chu Hospital sakna tura an duhna hmun ni mahse Sawrkar thutlukna apiang an pawm theih tur thu sawiin Joint Statement an siam a.

Chuti chung pawha Mizoram sorkar in Serchhip Dist. Hospital sakna tura thutlukna a la siam mai loh avangin ni October 19, 2022 a JAC te Meeting chuan Guwahati High Court ah PIL thehluh mai nise tih an rel ta a, chumi chungchang chu ni October 21, 2022 khan Serchhip Kawnpui Village Council Hall ah Serchhip khawchhunga VC leh NGO aiawh te Joint Meeting neihpuiin PIL file mai chu a hun tawh a ni tiin kalkhawm zawng zawng te hian ban pharin PIL file an duh thu an nemnghet a, hemi hnu hian Village Council hrang hrang leh mimal thahnem ngai ten Ukil rawihna atan pawisa thahnem tak an thawhkhawm nghal bawk a ni.

Serchhip JAC hruaitute chuan Guwahati High Court in rang taka an thubuai ngaihtuahna hun a siamsak chu lawmawm an tih thu an sawi a. Sawrkar hmalakna an thlir reng dawn tih sawiin mipui mamawhna a san tawh avangin a rang thei ang bera Serchhip District Hospital Building sa thuai turin Mizoram sawrkar an ngen nawn leh a,  MoU leh DPR a inziak ang lova sorkar in hma a la a nih chuan High Court in a phalsak angin PIL thehluh leh ngei an tum tih an sawi bawk.

Share now