Aizawl September 26, 2022: Vawiin khan Serchhip District Hospital thar sakna hmun tura ngaihdan inanglo pawl pahnihte chu District Bawrhsap Nazuk Kumar, IAS hovin thukhawm a, NGO Coordination Committee lam chuan sawrkar thutluknaah an lungawi thei tih an sawi a, JAC lam chuan a ngaia sak a nih theih nan hmalak zel an tum.

Bukpui lama sak duh pawl NGO Coordination Committee aiawhte chuan, damdawiin hi Bukpui-ah ngei sak an la duh reng tih an sawi a, hetihrual hian sawrkarin khawiah pawh sa se an lungawi thei tih an sawi a. A hmun ngaia sak duh pawl JAC lam chuan damdawiin hi a hmun ngaia sak a nih theih nan a theih ang angin hma an la zel dawn tih an sawi ve thung. Heng pawl pahnihte ngaihdan behchhan hian bawrhsap hriatpuinain thuchhuah intawm an siam a ni.

Nazuk Kumar chuan, kar hmasa lama an lo inhmuhkawm tawhna bawhzuiin vawiin hian inkohkhawmna an nei leh tih sawiin, PGCIL atanga CSR an hmuh sum chu pil bo (lapse) palh thei reng a nih thu a sawi a. Damdawiin sakna hmun tur thlan fel vat vat a tul takzet tih a tarlang a ni.