Aizawl: Mizoram khawpui fai inelna 2020 endiktu (Panel of Expert) te chuan nimin khan Serchhip khawpui chhung hmun hrang hrang fangin faina lama hma an lak dan an endik.

Panel of Expert te hian Chhiahtlang atanga endik hna hi tanin New Serchhip leh Serchhip veng hrang hrang te an tlawhkual leh a, veng hrang hrang an fan zawh hian District Urban Development Officer (DUDO) Office ah presentation hun nei lehin hemi hnu hian Thenzawl panin an chhuak leh a ni.

Mizoram khawpui fai inelna 2020 hi thuang (category) thuma kalpui niin, category-I-ah district headquarters 11, category-II-ah khawpui (town) dang 12 leh category-III-ah a pumpuiin khawpui 23 te an inel dawn a ni.