Aizawl : Sêrlui Joint Farmer-te chuan thuchhuah siamin, an hmunphiah tharchhuah man man zâwka hralh an tum laia, sawrkarin a mahal sak â, Kg. 1-ah Royalty Rs. 7 zêl min lâksak a tum chu tha an tih loh thu leh Royalty hi Kg. 1-ah Re. 1 lak thin a nih laia Rs. 7-a a pung mai hi hriatthiam harsa an tih thu an tar lang.

Hetih lai hian Kolasib atanga thudawnna chuan, “Jan. 19-a DC leh DFO hoa thutkhawmah an hrilh chiang viau a, an thusawi an man lo a nih ka ring, Mahalder-in Royalty Rs. 27 sorkarah a chhung anga private huan neiten sorkarah Rs. 1 per Kg an chawi ang, private huan neite chuan a hralhna chu an duh thlanna a ni,” tiin an sawi.

Serlui kuthnathawkte chuan sorkarin an hmunphiah thar te hi Kg. 1-ah chêng 30 âia sânga hralh theih loh tur min an siam sak lehzel chu an duh lo tih an sawi a, “Kan thlai tharte hi a lei to ngam bertu hnenah zalen taka kan hralh theih nan sorkarin ruahmanna siam thuai turin kan phut tlat a ni. Hemi chungchang hi January 19, 2022 khan Dr. Lalthlangliana, Deputy Commisioner Kolasib hnênah kan thlen tawh nghe nghe a ni,” an ti.