ZALEN February 16, 2025 : February 19 atanga March 20, 2025 inkar chhunga Assembly budget session neih turah Zirtawpni thleng khan house a chhan turin zawhna 828 a lut tawh.

ZALEN-in Aseembly Secretariat thawktute hnen atanga thu a dawn danin Zirtawpni kalta thleng khan house-a chhan chi zawhna ‘starred question’ 740 leh ziak chhan chi zawhna ‘unstarred question’ 88 a lut tawh a. Zawhna hi March 4, 2025 thlenga department azirin thehluh theih a ni a.

Heng bakah hian bill pathum lut tawhin chungte chu ‘Private Placement Agency Regulation bill, 2025’; ‘The Mizoram Urban & Regional Development Bill, 2025’ leh ‘Goods & Services Tax (1st Amendment (Bill), 2025 te an ni a. Hei bakah hian paper lay tur pathum, private member resolution 25, official resolution pakhat (Forest Department atanga lut) a awm bawk.

Speaker Lalbiakzama hova Bussiness Advisory Committee in ruahmanna an siam dan chuan session tan ni hian Mizoram larsapin house-ah thu a sawi ang a. February 21-ah sunna hun hman tur a niin hriat theih chinah sun tur hi pakhat, prime minister hlui, Dr. Man Mohan Singh a awm a. March 4-ah chief minister leh finance minister ni bawk, Lalduhoma chuan kum 2025-26 budget leh kum 2024-25 sum dil belhna (supplementary demand) a pharh ang a. March 12 atangin minister hrang hrangte demand sawi hova pass nghal zel tum a ni ang.