Aizawl: February ni 23,2021 atanga Assembly budget session neih turah bill 1 a lut tawh.

Zalen in Assembly Secretariat thawktute hnen atanga thu a dawn danin session a ngaihtuah tur hian bill pakhat ‘The Mizoram Licensing Veterinary Hospital and Clinic Bill, 2021’ a lut tawh a, Zirtawpni tlai thleng khan bill dang lut a la awm lo.

Budget session atan hian hriat theih chinah House a zawhna chhan chi (starred question) 352, ziaka chhan chi zawhna (unstarred question) 165, resolution 54 leh papaer lay tur 5 a lut tawh bawk.

Speaker hova Bussiness Advisory Committee-in ruahmanna an siam dan chuan session tan ni hian Larsap in House ah thu a sawi ang a, a tuk February 24-ah Larsap thusawi a lawmthu sawina sawiho a ni dawn a. Hei bakah hian session neih karlaka boral MLA hlui pahnih RD Sangkhuma leh K.Thangzuala te sunna hun hman a ni ang.

March ni 1,2021 (Thawhtanni) ah Chief Minister, Finance Minister ni bawk Zoramthanga chuan kum thar budget a pharh dawn bakah kum hluia sawrkar sum indaih loh avanga sum dilbelhna a pharh ang a. March 3 & 4, 2021-ah budget a tlangpuia sawihona ‘general discussion’ neih a ni ang a. March 9, 2021 atangin Minister hrang hrangte demand sawi a, pass tum a ni ang. Ruahman dan chuan session hian March 17, 2021 thleng a awh dawn a ni.