Aizawl August 23, 2024 : Vawiin hian Congress Party chuan Congress Bhavan-ah ‘Friday Political Session’ an hmang a. He hunah hian MPCC President Lal Thanzara chuan thu sawiin, “Tun hnai lawkah Mizoram Assembly session ni hnih awh neih a ni a, ni hnih chauh a ni na a, a ngaihnawmin a hmuhnawm ang reng khawp mai," a ti a, chutihrualin vanduaithlak a tih thu a sawi.

Lalthanzara chuan, “Session kha ka lo en ve a, chuta ka ngaihtuah chhuah chu kan 'KHB 471 na - Jordan lui piaha kan inkhawm huna' tih a, a chang tawp ber leh tlar hnuhnung bera 'Ennawn mak tak chu kan la hmu ang' tih kha kan thleng chho mek niin ka hria. A ennawm ang reng khawp mai."

“Mahse, House leader te Opposition leader te ka ni emaw inti ni awm ang zia zanga House a sawi chhuah chi awm loh tak an han sawi te kha chu a hmuhnawm aiin a vanduaihtlakin ka hria. 'Duh duh dana awm chu duh loh dan ang anga awmna’ an ti a, chutiang deuh chuan 'Duh duh sawi chu duh loh anga awmna' tih te pawh hi he sawrkar atang hian a lang thei emaw chu aw tih tur a ni," a ti.

MPCC President chuan, “Vawiin niah hian roreltu kan hrawn mek te hi Pathian ruat an nih kan pawm a, chutihrual chuan ni tha lo va, roreltu tur te leh harsatna siam tur hrim hrimin misual te pawh hi Pathianin a siam a ni lawm ni tih turin Bible ah hmuh tur a awm a ni. Thuthlung hluiah a hnam thlante laka a lungawilohin Pathianin anmahni hrem leh zialhhau nan ring lo mite a hmang thin."

“He sawrkar hi kan ram leh hnam tan malsawmna ni tur chuan Pathian hruaina, malsawmna a dawn a ngai a ni. Central atangin development tam tak hmu thin mah ila, Pathian duhdan anga enkawl a nih loh chuan Mizoram tan leh Mizo mipui ten hmasawnna aiin vanduainaa ni thei a ni," a ti.

Lal Thanzara chuan malsawmna an dawn thu sawiin, “Mizoram-ah Mizo Union leh Congress, PC leh MNF an sawrkar tawh a, tunah ZPM an sawrkar a, khang hun kalta zawng zawngah khan Pathian hruaina ropui tak kan ramin a dawng thin a ni. Mizo Union hnuaiah inrelbawlna kan la neih ngai loh, district council kan nei a UT te, State te kan nei chho va, khang hun kalta zawng zawnga kha kan thlirlet a nih chuan Congress sawrkar laiin kan ram hian Pathian malsawmna a dawng nasa ber emaw ni chu aw tih tur a ni."

“Kan rama hmasawnna tluantling zawng zawng hi Congress sawrkar laia kan neih a ni. Power chungchang te, sawpchhiat vek a nih tawh hnu a, siamthat leh a ni dan te kan hre vek a, referral hospital tur dik lo taka sawp chhiat a nih hnuah referral hospital mai ni lo College thlenga din anih dan te, khawvel mihring tung chhova kal tena kan mamawh tui chungchang te, Congress sawrkar in ruahmanna fel tak kan neih dan te, khualzin te, damlo te tana mamawh airport leh helicopter service te, thalai infiammite mamawh infrastructure te Congress sawrkar laia Pathian malsawmnaa kan neih a ni.

ZPM chungchang sawiin, “Thangthar rambuai pawh hre lo, lehkha tak tak chhiar a bihchiang peih si lo social media a innghat te an thluak an su a, ‘kum 30 chhungin MNF leh Congress in sawrkar chhawk kha engmah an ti lo’ tiin keini min enchhin rawh u an ti a. Social media avangin ZPM a sawrkar a, social media avang vekin sawrkar atanga an chhuah leh thuai ka ring a ni.” a ti.