Aizawl: Congress party chuan November 5, 2019-a Sinlung Hills Council inthlan lo awm tura MNF party campaigner thenkhatten, 'MNF leh an thawhpuite an thlantlin loh chuan development-ah hrek an ni ang,’ tia mipui vau an ching chu a tha lo an tiin, mipui zah lohna a ni, an ti.

MPCC Media department leh Communication department chuan nimin khan Aizawl Press Club-ah thuthar lakhawmtute kawmin SHC-a MNF party campaign dan chu tha lo an tih thu an sawi a. MPCC Media chairman Lallianchhunga chuan, “Sinlung Hills Council (SHC) hian budget hran a nei dawn a, state sawrkarin a duh duha a hrek theih a ni dawn lo a. Budget hran neia Sinlung Hills Council (SHC) member-ten session-ah an pass a, an area chhung hmasawn nana roreltu tur an ni a, state sawrkarin an duh duha an rah hruala an hrek beh theih a ni dawn lo a ni,” a ti.

Congress party chu HPC nen inremna siamtu an ni tih sawiin, “MLA inthlana HPC nen kan inremna angin, Sinlung Hills Council (SHC) inthlanah chuan Congress party chuan HPC candidate-te thlawp tha kan ti a; mahse, an hruaitu thenkhat, anmahni hamthatna duhtuten MNF rim kualin MNF an thawhpui ta a, pawi kan ti hle a ni,” a ti a. MNF leh HPC-te an thawhho tâk thut avangin Congress party chuan hmanhmawh takin candidate an siam ta niin a sawi bawk.

Lallianchhunga chuan minister-ten SHC inthlan campaign-naah Model Code of Conduct bawhchhiain political party campaign-naah school naupang an khawm thin niin a sawi a. MNF leh HPC thawhhonaah MNF-in seat 7 leh HPC-in seat 5 chuh tura an in sem chuan HPC Area-ah MNF sawrkar dinhmun a derthawng hle tih a lantirah an ngai niin a sawi bawk.

Zawhna chhangin MPCC hruaitute chuan bial 12 awmna SHC-ah MPCC-in party malin bial 6, ZPM leh mi dangte nen bial 4 an chuhho bakah bial 2-ah independent an thlawp niin an sawi.