ZALEN October 31, 2024 : Sinlung Hills Council inthlan campaign-a zin chhuak mek Lalnghinglova Hmar, Sports and Youth Services Minister chuan Sinlung Hills Council sum awmte chu bei tham deuhin lang mah se, dik taka hman chuan hmasawnna thlen thei a ni a, ZPM-in sawrkarna an chan chuan a dik thei ang bera sum an hman tur thu a sawi.

Lalnghinglova chuan, "Ka kal kualna hmun thenkhatah Council sum hman danah mipui an lungawi kim loh thu te, langtlang taka thil kalpui loha hnathawhna sum awm zat pawh mipuiin an hriat loh thute min hrilh a, ZPM kan sawrkar a nih chuan langtlang takin sum enkawl a ni ang. Hnathawktu chuan thawh hlawh chu a nei ngei tur a ni a, nimahsela uchuak taka hlep tumna leh sum thuhruk awm thin hian hmasawnna a tithuanawp a, mipuite pawhin kan venpui tlat tur a ni," a ti.

LESDE leh Excise Department enkawltu ni bawk chuan, "Sinlung Hills Council kalpui mek dan, an sum hmuh zat leh an dinhmun en hian tun aia thaa kalpui theih a ni ngei ang, hei hi ZPM-in kan tum pawh a ni. Tihhlawhtlin theih loh tur thil lian pui pui tiam ka tum lo a, nimahsela kan theihna chinah tun ang ringawt lo deuh hian kan kalpui ngei ang. He Council huam chhunga miten hmasawnna thlen phak lohna ram anga an inngai reng hi a fel lo takzet a ni," tiin a sawi.

Lalnghinglova chuan politics chu ram siamna hmanrua a ni a, lal inchuhna ringawt anga kan ngaih chuan a tum a thelh a ni tiin, "Ram siam tum tak tak lo tan politics chu mahni insiamna mai a ni thin, kan theihna a sang lo a nih pawhin kan phak tawkah ram siam tumna kan neih phawt chuan Sinlung Hills Council atang pawhin ram hi siam theih a ni a, mipui nawlpui pawhin mahni ram veina tak tak kan neih chuan ram hruaitute kal sual tur veng theitu kan ni, "a ti a; Sinlung Hills Council inthlanah ZPM an sawrkar a nih pawhin mipuite chu hruaitu thlan tharte vengtu ni zui zel turin a chah.