Aizawl; Sialsuk Primary Health Centre (PHC) a medical officer Dr Linda Lalbiaknungi chet dan leh damdawiin a damlo enkawl lai Lalrengpuia chhuahtir chungchang chhui chiang tura ruat, Aibawk BDO chuan a report Health secretary hnenah a thehlut tawh. 

ZALEN thudawn danin Sialsuk PHC a thil thleng chhui chiang tura ruat, Aibawk BDO Chinlianmanga chuan June ni 10, 2022 khan a chhuina report chu health secretary R Lalramnghaka hnenah a thehlut a, a report te zirchiang a, a tul dan anga hmalak zel dan tur ngaihtuah turin Health minister hoin department official te an la thukhawm leh dawn.        

Media hrang hrang a tarlan a lo nih tawh angin, Sialsuk PHC a medical officer Dr Linda Lalbiaknungi chet dan leh damdawi ina damlo enkawl lai chhuahtir chungchang chhui chiang turin Health department chuan June ni 1, 2022 khan Aibawk BDO Chinlianmanga a ruat a. June ni 10, 2022 ral hmain Health secretary hnenah report thehlut tura tih a ni.

Damlo chunga Dr Linda Lalbiaknungi chet dan leh damlo Lalrengpuia, Sialsuk chunga a thil tih dan nia sawite chuan tunhnai ah social media hrang hrang a luah nasa hle a, doctor chu damdawi in atanga Lalrengpuia hnawt chhuakah puh a ni.

Social media lama tarlan a nih danin, Dr Linda Lalbiaknungi hian canteen-ah Rs 1,000 a ti bo a, pawisa rutuah Sialsuk damdawi ina damlo enkawl lai Lalrengpuia chu puhin, damdawi in atangin May ni 12, 2022 ah a hnawt chhuak a, damdawi in atanga a chhuah tuk, May ni 13 zan ah a thi nia sawi a ni bawk.

Dr Linda Lalbiaknungi hi June ni 2, 2022 atang khan chawlhtir (suspend) a lo ni tawh bawk a. Health secretary R Lalramnghaka'n thupek a tihchhuaha a lan danin, Dr Linda Lalbiaknungi chu hotu lu atanga phalna la hmasa lo chuan Aizawl chhuahsan lo tura hriattir a ni.

Dr. Linda hi ZALEN chuan biak pawh a tum a, sawrkar hmalakna leh thil chhui hna kal lai mek a nih vangin a tan thu leh hla neih a rem loh thuin a chhungte atangin chhan na dawn a ni.