Aizawl: School Education Director James Lalrinchhana chuan, Covid 19 hripui leng avangin academic session thar 2021-22 atana sikul kai tan hun tur hriat theih a la nih loh thu sawiin, HSLC leh HSSLC result chu ruahman lawk anga tih-chhuah tum a nih thu a sawi.

ZALEN zawhna chhangin School Education Director chuan May 4, 2021 atanga sikul kal tan hun tura ruahman tawh chu State Disaster Management Authority hnuaia State Executive Committee (SEC) thu chhuak angin suspend a nih thu a sawi a, Covid 19 hrileng dinhmun thlir in sikul kal tan hun tur ruahman a nih tur thu a sawi.

HSLC leh HSSLC exam result chu a hun tur ruahman lawk, June chawlhkar hmasa ber ah tihchhuah tum a nih thu sawiin, James Lalrinchhana chuan, "Tunhnai ah HSLC result peihfel tep a nih tawh thu report kan dawng a, hetiang bawk hian HSSLC pawh a hun takah tihchhuah theih kan inbeisei," tiin, India ram state hrang hrang zingah a hun taka result tichhuak thei an nih te pawh a beiseiawm niin a sawi.

School Education Director sawi danin, SCERT in '4 Week Alternative Academic Calendar for Elementary Schools in Mizoram' an buatsaih chu class pangngai kal theih loh chhungin hman tur a ni a, MBSE buatsaih 'Week Wise Plan' chu high school leh higher secondary school ten kalpui tur a ni.

Tunhnaia School Education Director in order a tihchhuah a tarlan a nih danin, sikul zawng zawngte chu online class kalpui tura kaihhruaina siamte zawm tura tih an ni a, chutih rualin, zirlaite tana hahthlak lutuk tur leh hun rei lutuk hmanpui loh tur a ni thung.