June 27, 2022; Silchar tuilian tuar, tui tlachham a awm mekte tan Central YMA ah tanpuina thilpek a lutkhawm chhunzawm zel a. Hetihlai hian nizan lam a tui thianghlim in tur pe a Silchar a kal, CYMA team te chuan Kabuganj mission compound a Mizo tangkhang 19 te chu him takin Mizoramah an rawn hruai haw nghal nia thudawn a ni.

Tanpuina pe a Silchar kal zing a mi, CYMA treasurer Fabian Lalfakawma chuan, anmahni lo dawngsawngtu Cachar a Assam sawrkar official te an lo lawm thiam hle tih ZALEN hrilhin, "Assam official te Mizo mipuite inpekna ah an lawm tak zet niin kan hria a, Mizo mipuite duhsakna an hmu chu mak an ti a, an hotu lam te pawhin min lo kuah ve ngawih ngawih hial a ni," a ti. 

Central YMA team te hi Cachar a sawrkar aiawhte chuan an hnam (Assamese) puanbah te an lo bah tir bakah, hun hnawhsarum tak karah ei tur tuihnai tak an lo pe a, an kal lam atangin Dholai PS OC in escort a lo ruahman sak a, an awm chhung zawngin an nghak a, an rawn haw lam ah pawh CYMA team lamin a ngai tawh lo ve, an tih hnu, Lailapur pelh thlengin an rawn escort chhunzawm hial a ni.

Central YMA team te hian nizan dar 11 vel khan Mizoram an rawn pan leh nghal a ni.

Hetihlai hian vawiin lamah Silchar tuilian tuar, tui thianghlim tlachham mekte tan Central YMA ah YMA branch, mimal, NGO leh kohhran hrang hrang atangin thilpek (tui cases thahnemtak leh pawisa fai) a lut chhunzawm zel a, Central YMA chuan a pek dan tur ruahmanna a la siam leh dawn a ni.

LAWMAWM/NGAIHNAWM : Nizan lam thil thleng;

• Bagha YMA (Young Mens Association) ten tuisik phur motor ah theitui an lo sem.
• CYMA team te motor, 407 truck pakhat Khamrang ah a chhiat avangin Vai 407 truck hire a ni a, driver Akbar tia hriat chuan, 'Kan mite tanpuina tur a ni a, diesel man bak ka la thei lo,' tiin CYMA team hi a lo chhang.
• Tuilian avang a tangkhang mi 19 te, YMA team te Motor ah Mizoram  rawn phurh thlen an ni
• Tangkhang phurh chhuahna (Silchar- Kabuganj) motor man senso CYMA in a tum sak
• CYMA team te Sonai MLA in zanriah buatsaih sak a tum a, mahse Mizoram rawn let an duh hmanhmawh deuh avangin an eisak ta lo.
• Tui in tur petu te rawn haw lam zingah, khawvar dawn a tui in tur nghei an awm nual.