June 26, 2022; Silchar tuilian vanga harsatna tawk, tui thianghlim tlachhamte tan a Central YMA in tui litre 15,000 vel a thawn chu zanin dar 9 vel khan Silchar thlenpui a ni a, DC office a dah tum a nih laiin, tui thianghlim mamawh mipuite laka Central YMA team te himna venthawn thu-ah, Sonai Road a Revenue Circle Office ah hlan thlak a ni.

Central YMA president R. Lalngheta'n ZALEN a hrilh danin, Central YMA chuan nizan khan Silchar tuilian a harsatna tawk ten tui thianghlim an tlakchham chungchang-ah chawpchilh ang reng takin ruahmanna an siam a, chumi ang chuan tui litre 15,000 bawr vel, mimal leh YMA branch hrang hrang ten an pekkhawm chu vawiin chawhnu lam khan lirthei 10 bawr velin Silchar panpui a ni.

Silchar a sawrkar thuneitute nen ruahmanna an siam danah, tui te hi Silchar DC office a dah tur a ni a, mahse Sonai road a revenue circle officer chuan lo dawngsawngin, kawng helna awm mahse, mipui mamawhna a san tawh avangte, tui an phur tih an hriat chuan mipuiin harsatna an lo siam an hlauh vangte, an himna atan a pawi thei a nih vangte in, Silchar DC office thlen loin, revenue circle office ah zanin dar 9 bawr vel atang khan hlan thlak (unload) a ni ta zawk a, a tul dan ang a a semdarh hna an lo thawh tur thu circle officer chuan Central YMA team te a lo hrilh a ni. 

Silchar mipuite harsatna tawh-ah a theih ang ang hmalakna neih chhunzawm an tum tih Central YMA president chuan sawiin, a duh tan donation pek zel theih a nih thu zan in khan Central YMA GS in thuchhuah a siam leh nghal thu te, tuna an hmalakna chu Mizo chauh ni lo, hnamdang pawh huap vek a nih thu te sawiin, Silchar tuilian tawkte tana tanpuina pe duh YMA branch tam tak an la awm nia an hriat thu te a sawi.

Hetihlai hian Silchar tuilian vanga harsatna tawk Mizote chu chhanchhuah fel an ni thawkhat tawh nia hriat a ni a, Mizoram rawn thlenpui an awm tawh laiin, thenkhatte chu Silchar mission compound ah an la awm a, vanneihthlak takin mission compound ah hian tui thianghlim pump chhuah theih a awm vangin an dinhmun a ziaawm nia hriat a ni. Hetihlai hian Silchar Mizoram house lam a thangkhangte pawh a theih ang angin chhawmdawl mek zel an ni bawk.

Central YMA team te hi treasurer Fabian Lalfakawma hova kal an ni.