June 20, 2022; Assam a tuilian chuan ziaawm lam a la pan thei lova, Barak lui (Tuiruang lui) luang liam a nih tawh avangin vawiin (June ni 20) lamah tuilian a nasa zual a, Silchar Mizoram House pawh tuilian in nasa takin a chim a, he thu ziahlai thleng hian Silchar a Mizo awm thenkhatte pawhin Silchar mission compound an bel tawh.

Silchar Branch YMA hruaitute hnen atanga ZALEN thudawn danin, tuilian tuar zingah Mizo engemawzah an tel tawh a, vawiin tlai thleng khan an chenna hmun chhuahsan a mission compound bel chhungkaw 4 bawr vel an awm tawh a, tuilian dinhmun a zir a hmun him bel pawh an la awm belh zel rin a ni.

Hetihlai hian Silchar Mizoram House chu nasa takin tuilianin a chim a, house kawt a lirthei inhung engemawzah tuilianin a chim tawh a, Silcharah hian inbiakpawhna a mumal loh avangin he thu ziahlai thleng hi chuan Silchar Mizoram House dinhmun chiang taka hriat theih a la ni lo a, zanin thlengin Mizoram house hi tlawhpawh theih lohin a awm. Thudawn danin, DRC te chhungkua chu Mizoram house floor 3 na ah an insawn chho a, ngaihtuahawm an ni lo nia hriat an ni.

Thudawnna Silchar Branch YMA hruaitute chuan tunhnaiah tui a lian dawn tih warning an hre chho reng tih an sawi a, YMA lam pawhin harsatna tawk leh tanpui ngaite chu inreport tura hriattirna an chhuah reng thute an sawi. 

Silchar Branch YMA president K. Vanlalhriata chuan, Silchar a kristiante'n an theih ang angin midangte chhawmdawl hna an thawk tih sawiin, thenawm khawveng tuilian vanga mangang tak tak te tanpuiin Mizote an hmanhlel hle tih ZALEN a hrilh.

Thudawn danin, Silchar Branch YMA president hi a chenna hmunah floor hnuai ber luah niin, tuilianin a tibuai hle a, hetihlai hian a thenawm ah hnamdang nufa chauh awm te dinhmun a ngaihtuah vangte leh tuilianin an chenna a chim vanga an bungraw senghawipui a ngaih pawimawh avangin he thu ziahlai thleng hian a chenna in chhuahsan loin a la awm.