Aizawl: November ni 5,2019 a Sinlung Hills Council inthlan lo awm turah candidate 42 an awm a, Council member hi 12 thlan tur an ni.

Zalen palaiin State Election Commission, Mizoram thawktu te hnen atanga thu a dawn danin Sinlung Hills Council (SHC) thlan turah hian Independent candidate 24 awmin party dang ten candidate an neih dan chu BJP 2, INC 6, MNF 7, NPP 2 leh HPC 1 te an ni a. Khawlian bialah candidate 4, Phuaibuangah 5, Suangpuilawnah 4, Vanbawngah 5, Ratu-ah 2, New Vervekah 2, Sakawrdai South-ah 3, Sakawrdai North-ah 4, Zohmu ah 2, Tinghmunah 4, Saipumah 3 leh Saiphai bialah candidate 4 an awm a ni.

State Election Commission-in ruahmanna a siam dan chuan inthlanna hi November 5, 2019 zing dar 7 atanga tlai dar 4 inkarah neih a ni ang a, vote thlak zawh veleh vote tlate hi chhiar nghal a ni ang. Vote thlak that ngai a awm a nih chuan Nov. 7-ah thlak nawn tur a ni a, inthlanna kaihhnawih thil chu November 8, 2019 ah chuan zawh fel vek tura tih a ni.

Sinlung Hills Council inthlan loawm turah hian polling station 38 a awm a, heng zinga p/s 31 hi Aizawl district a awm a ni a, a dang 7 hi Kolasib district huam chhunga awm a ni. Sinlung Hills Council huam chhungah vek hian vote nei mi 21,686 awmin heng zinga 10886 hi mipa an ni a, hmeichhia 10800 an awm bawk. Rules 50, 51 & 52 of The Mizoram (Election to Sinlung Hills Council) Rules, 2019-in a sawi angin Sinlung Hills Council inthlan turah hian ballot box leh ballot paper hman tur a ni.