ZALEN August 21, 2025 : Vawiin khan Aizawl khawpui chhunga Sub-Divisional police Officer(SDPO) leh Police Station-a Officer-in-Charge (OC)-te telin, Aizawl SP Office-ah Aizawl District Police Officer-te an thukhawm a, tun hnaia Bengal Eastern Frontier Regulations (BEFR). 1873 hnuai a Inner Line Permit (ILP) kenkawh mek dan an sawihona meeting an nei.

Kalkhawmte chuan tunlai Aizawl District chhunga ILP neih ngai hnamdang lo luhdan thlirhona an nei a. August ni 20 atanga September ni 11, 2025 thleng awh tur, CAPF. SSF leh Assam Rifle Rifleman lakna kal mek, 'Combined Recruitment Rally' avangin intlar tur candidate 7422 Aizawl-a an rawn fuankhawm mek chuan ILP dilna a tih tam mai bakah khawlaiah veivak a tih tam thu an sawi a, sipai intlar tura lo lut thalaite hi sipai lak a zawh chuan mahni awmna lama haw leh mai tur a ngaih an nih thu sawilan a ni.

He thil avang hian ngaihthat lohna tur a awm lovah an ngai a, hetiang a recruitment rally lian a awm leh dawn chuan, candidate ten a tlachawp a ILP dil lo in, online a dil theihna hrilhhriat ni se harsatna tam tak a sutkian a rinawm thu pawh sawilan a ni.

Police Officer kalkhawmah hian kum kal mek (2025) chhung hian ILP checking vawi 48 (sawmli leh pariat) neih tawh tih report a ni a, ILP neilo leh hmangsual mi 281 lai manchhuah tawh an ni a, hengte hi Court hmaah hruai an ni. Police officer kalkhawmte chuan hmalak tawhnate tha thawkhat viau in lang mah se, hmalak thar a ngai nia hriain, hmachhawp atan ILP checking ngawrh zawk a neih an rel. ILP checking neih dan tur ruahmanna siamin, Aizawl khawpui chhunga veng hrang hrang te, a veng bil a theih anga tuam turin ruahmanna siam a ni. Hemi atan hian veng bil Local Council leh NGO hrang hrangte pawh phungbawm a sawm ni se, an ti.

Thenawm state-a ramdangmi hnawhchhuahna kal mek in Aizawl District leh Aizawl khawpui a nghawng em tih pawh sawiho a ni a, hmalakna hi Darrang, Dhubri, Goalpara, Golaghat, Hojai, Morigaon leh Nagaon District-te an ni hlawm a, Mizoram atang a hla tak vek an nih avangin, tun dinhmunah chuan min tihbuaina tur hriat a la nih loh bakah heng district atang a lo lut an awm hriat a la nih loh thu sawilan a ni bawk. Amaherawhchu, fimkhur thuah erawh ILP checking beihpui thlak lai in uluk lehzual a hmalak turin rel a ni.