Aizawl May 8, 2023 : Mizoram Ex-Services League (MESL) hruaitu thar te chuan an President, Lt Col Clement Lalhmingthanga hovin vawiin khan Raj Bhavan-ah Governor Dr Hari Babu Kambhampati, MESL Chief Patron ni bawk chu an hmu a. Sawrkara 5% reservation an neih a taka hman a nih theihna tura hmala turin an ngen.

Sipai bang hruaitu te hian Governor hnenah hian Mizoram state sawrkar hnuaia hnaruak hnawhkhah tur zinga Group B, C & D a Ex-Servicemen te tana 5% reservation chungchang an thlen a, Governor chuan Mizoram sorkar hnuaia hna Ex-Servicemen te tana 5% reservation siam, a taka hman ni si lo chu a ngaihpawimawh thu leh theihtawp a hmalak pui a tum thu a sawi. 

MESL hruaitute hian Aizawl Khatla leh Champhai a CSD Canteen Extension siam a tul thu te, Ex-Servicemen Contributory Health Scheme hnuaia Thuampui Polyclinic tih changtlun dan tur te leh a thawktu officer leh staff atan khawtual mi ruat a pawimawh chhan te leh HQ MESL Office Treasury Square a mi tih changtlun dan tur te pawh sawiho a ni. a. Governor hian an mamawh thlen dang te pawh lo enfiah a, a theih anga hmalakpui a tum thu a lo hrilh a ni.

MESL ten report pek dan chuan Mizoram-ah ex-servicemen 5724, sipai thihsan hmethai 2500 chuang leh ex-servicemen leh an chhungkaw member tena hamthatna an dawn thin dawng thei mi 24000 bawr an awm mek a. Sipai tang lai mi 3000 chuang an awm mek bawk.