Aizawl : Aizawl Municipal Area chhunga veng hrang hrangten bawlh-hlawh an paihna thar, Solid Waste Magement Centre, Tuirial-a mi chu he hmuna bawlhhlawh paih motor khalhtute chuan hun (timing) vawn mumal theih a nih loh avangin an duhkhawp lo hle a, paih tura hun an mamawh tam avangin harsatna tam tak an tawh phah niin ZALEN an hrilh.

Tuirial-a bawlhhlawh paihnaah hian AMC chu bawlhhlawh lak khawma hmalatu niin State Investment Programme Management & Implementation Unit enkawl a ni bawk.

Tawih theih paihna a hran aawm a, tawih theih lo leh plastic lam atanga siam hnawm paihna hi hmun khata paih a ni thung a, heng an paihna ‘Landside Fill’ hi a tet avang harsatna an tawk nasa hle tih bawlhlawh paihtute chuan an sawi.

“Zing dar 9-ah pawh thleng ila, paih turin darkar thum aia tam kan din a ngaih changte a awm thin, paihna hmun an siam hian bawlhhlawh hi a zo lo a ni ber,” tiin ZALEN an hrilh.

Solid Waste Magement Centre, Tuirial hi tlai dar 5-ah khar thin a ni a, awlsam taka paih mai theih ni se chu a pawina a awm hranpa loh thu an sawi a. Veng pakhata bawlhhlawh paihtu chuan, “Zingkar atangin bawlhhlawh kan khawn a, 9-10 AM-ah te kan zo a, tlai lama khawn chhunzawmte a ngai thin. Mahse, a hmunah darkar thumte kan khawtlai a, kan let hnuah bawlhhlawh han khawn leh mah ila, a paihna hmun khar hunte a lo nih tawh chuan kan tan a buaithlak thin, kan timing angin kan kal theih loh phah a, a tuartu chu mipui an ni leh thin. ‘Zan lamah kan lo thianfai ang,’ an ti a; mahse, then fai hman loh hi a tam zawk a ni,” tiin ZALEN a hrilh.

Bawlhhlawh tam ber, plastic-a siam thil leh tawihthei lo huanga mi paih khawm a ni chu harsatna bul ber niin an hria a, he ‘Landside fill’ hian tun dinhmunah Aizawl bawlhlawh hi a dawl zo lo ni berin an ngai. Bawlhhlawh thliar hrang tur tam zawk emaw, bawlhlawh hralh tur la khawm zung zung tur emaw ko lut se a zia-awm an ring.

Hemi chungchangah hian bawlhhlawh paihtu pawl, PPP Mode Driver Welfare Adviser, an President hlui K. Lalruatngheta chuan, "Tunlaiin SIPMIU lam tan pawh sum chang thei bawlhhlawh hralh a har a, chuvangin a buaithlak chin chu a awm maithei. Mahse, heng sum chang thei bawlhhlawh dahkhawlna hmun hrim hrim hi an nei tha lo, chu chu buaina a ni. A nihna takah chuan plastic kaihhnawih bik te phei chu thliar ngai tawh lo tluka khung hran thlap vek an a ni a, heng dahkhawmna tur te hi chu an nei ve tur a ni. An thei rih lo anih pawhin tunhma ang khan bawlhhlawh zawng khawm a, hralh leh thin ho ang chi kha an luh phalsak leh se chuan a ziaawm ang, mihring an tlem si a, nitina bawlhhlawh trip 80 atanga 150 dawn thliar tur khawp mihring an ruai lo hrim hrim a ni. Khutianga khu chuan paihna tur kan nei lo thuai ang," tiin a sawi.