Aizawl: ZPM chuan Aizawl Smart City project hnuaia Aizawl khawpui dan bawhchhiatna laka mipuite an him zawkna tur leh dan bawhchhiate awlsam taka chhui zung zung an nih theihna tura hmun hrang hranga CCTV system (Integrated Control and Command Centre - ICCC) dah tura hmalakna kal mekah cheng vaibelchhe 41 zet chu tu ten emaw an fanghmano eiin a riral ngei dawn nia an hriat thu an sawi a. Hetih lai hian Chief Executive Officer, Aizawl Smart City chuan thil hriatchian tawk loh vang mai nia a hriat thu a sawi.

Nimina thuchhuah an siamah ZPM chuan Ministry of Urban and Housing Affairs atanga sum lokal, Aizawl Smart City project hnuaia Aizawl khawpui hmun hrang hranga CCTV system dah turin Bharat Electronic Limited (BEL) hnenah contract cheng vaibelchhe 101.02 man pek a ni a, mahse, he hna hi BEL chuan anmahniin thawk lovin vaibelchhe 60-a hralh leh chhawn tumin tender a chhuah leh mek a, heti a nih chuan vbc 41 an fanghmano ei hmak dawn niin an sawi a.

An thuchhuah tarlan danin BEL in tender an chuah chu a chhangtu tupawhin hna chu hmuin lo thawk dawn sela an hnathawhna tur hmanrua khawl leh bungrua zawng zawng leina tur company thlenga ruat sakin an tender-ah hian tarlan a ni a, chung zingah chuan China company Hikvision, Infinova leh CPPlus te pawh an tel nia sawiin, “Tuna hman tura an tih China khawl leh bungruate hi kan khawpui ber chhun zan zawma chawl loa min vil a, min thlir rengtu atana hman turin a him em tih thlengin a ngaihtuahna a ti thui hle a. Tunlaiin India sawrkarin China bungrua tam tak a boycott laiin heng China company siam hmarua te lo hman hi ngaihtuah chian a ngai hle a ni,” an ti.

ZPM thuchhuah chuan BEL chu Belgavi, Agar, Namchi, Delhi leh hmundangah te hna an thawh chhiat avangin an lo hmingchhe viau tawh nia sawiin, “Belgavi-ah hian Aizawla an tihdan ang bawkin midang hnenah an lo hralh chhawng chiam a, a hunah an zo thei lo a. Delhi-ah pawh a hun taka hna an zawh theih loh avangin sawrkar in vbc 16 lai chawitir a lo tum mek a. Heti chung hian Aizawl Smart City project hnuaiah hlawk uchuak takin contract an la rawn hmu thei cheu mai hi a mak hle a ni,” an ti a.

BEL chu PSU anih avangin India sawrkarin duhsak mah se, state sawrkarin a hnawl thei nia sawiin, "Ministry of Urban & Housing Affairs chuan BEL hi PSU a nih angin a duhsak a, State leh UT sawrkar te pawh contract hi lo pe tur chuan a recommend ngei a, chung zingah chuan Mizoram pawh a tel. Mahse, state leh UT sawrkar te hian an zawm ngei ngei tur tihna a nih loh avangin state thenkhat chuan an hna a chhiat em avangin BEL hi contract pe kher loin open tender an chhuah fo a ni," an ti a. Mizoram sawrkarin engmah sawisel nei lova hetianga BEL an duh ang nga an tal tir mai mai hi ZPM chuan ngaih that thlak loh hle in a hria a ni, an ti a. Mizoram sawrkar chu state thenkhat te tihdan anga Public Sector Undertaking (PSU) hming tha tak ni lem lo hnena pek ngawt ai chuan tender chhuah tha leh zawk se an duh thu an sawi bawk.

Chief Executive Officer, Aizawl Smart City Er. Lalrothanga chuan BEL chu sawrkar laipuiin agency atana a ruat a ni tiin midang hnena hna pek chungchangah, "ICCC hna reng rengah System Integrator an awm a ngai thin a, system integrator chu khawl hrang hrang lo thlunzawmtu tur a ni a, hei hi an hmang ngei ngei thin a. State dangah pawh SI an hmang vek a, Aizawl atan pawh zawn mek a ni a. Hna hralh lam ni lovin BEL in anmahni thiam lam an khawih ang a, SI in an bak an thawk dawn zawk a ni," a ti a. Ministry of Urban & Housing Affairs pawhin hmarchhak bial a smart city hna thawk turin ICCC ah BEL chu a ruat tih sawiin Aizawl khawpui tan pawh an thawk niin a sawi.

BEL in khawl leh bungrua leina tur company thlan sa an nei nia sawi chungchangah Chief Executive Officer, Aizawl Smart City chuan, "Specification hmanga lei tur hi ruahman a ni a, company mal thlan a awm lo a, quality tha an duh vang zawk a ni," a ti a. Tuna hna thenkhat midang thawh tir tum pawh hi an zawh hnuah a enkawl hna hi kum 5 chhung BEL in an la thawk leh dawn niin a sawi a. BEL chuan an hnathawh kawngah hmingchhiatna an neih awm an la hriat loh thu sawiin hmarchhak bialah pawh hna an thawk mek niin Zalen a hrilh bawk.