September 19, 2022; Vawiin chhun dar 11:50 vel khan Bawngkawn atanga Durtlang Leitan thlen chhoh hma deuh ah SML tipper chesualin, a khalhtu Lalrintluanga (34) s/o Laltlanliana, Durtlang Kawnveng a thi.

ZALEN thudawn danin, tipper ah hian a khalhtu bak midang chuang an awm lo a, Leitan atanga Bawngkawn lam pana tlan thla niin, kawngthlang a ke a kalna footpath chil kaiin, a hnuai, kham sang takah a lum thla a, a chetsual hma deuhin, Bawngkawn lam atanga Durtlang pana tlan chho, scooty, Ray MZ 01 W 0747 chu suin, vanneihthlak takin a khalhtu Lalmuanpuia, Durtlang Leitan chuan hliamna a tuar lo a, scooty hmalam erawh a chhe nual thung.

Chetsualna thlen tirah tipper chesual chuang zat leh a khalhtu hriat a ni mai lo a, a hnuah a khalhtu hriat niin, midang chuang an awm lo tih pawh finfiah a ni.

Lirthei chetsualna hmun hi kham sang lai a nih avangin chet vel a harsa hle a, Bawngkawn Brigade lam, Leitan lui lam atangin mi tlawmngai thahnemtak ruang la chhuak turin an kal a, lirthei tlanliamna lai ah Police lamin an tih turte an ti nghal bawk a, thudawn danin, chawhnu dar 3 vel khan a ruang lakchhuah niin, zaninah lumen a ni ang a, naktuk ah vui a ni ang,