Zuk leh hmuam leh Mizote Kumin kumtawpah hian Mizoramah Global Adult Tobacco Survey (GATS) neih a ni leh dawn a, hetah hian Mizorama zuk leh hmuam ti zat chiang taka tarlan a ni dawn a, mi thahnemngai ten nasa taka an beihna in rah tha a chhuah nge chhuahlo tih survey-ah hian chiang takin a lang dawn a ni. Kum 2009-2010 a GATS neih ah chuan Mizoram chu khawvela vaihhlo leh a kaihhnawih hmang nasa ber a ni a, ram rethei tak mai, vaihhlo hmang nasa kan ni hi a zahthlak bakah sum leh pai kan sen nasat tur zia ngaihtuah hian a uiawmin a zahthlak hle! Vaihlo leh vaihlo atanga siamchhuah (tobacco products) hrang hrang eizawnna atana hmang an la awm nual bawk a, heng miten an eizawnna an thlak theihna tura kawng kawhhmuha tanpui hi zuk leh hmuam tihremna tura hmalakna tangkai tak a nih ngei a rinawm bawk. Chutiang ni lova, danin a khap a nih avanga khawng taka kenkawha tihtawpsak chu thil tha ber a nih a rinawm lo a, chuvangin, tlawmngai pawlte, kohhran leh sorkar thleng pawhin heng mite tana eizawnna bul tanna tur ngaihtuahsak dan kawng dap ni thei sela a duhawm hle. Vaihlo/meizial hi a zutu tan mai a pawi a ni lova, a bul vela zial zuk khu lo hiptute tan pawi nasa tak a thlen tel bawk avangin zial zu mite pawh an inthlahrung sawt viau a, mahse, thingtlang lamah erawh chuan a la hluar viau. Zial zu thinte an inkiltawih tawh viau rual hian, midangte tana harsatna thlentu an nih haider lui tlat tawk an la awm a, heng mite hi zial zu lote pawhin an dinhmun tiderthawng thei a nihzia hriattira khak ngam a hun tawh hle bawk. Tin, vaihlo leh a kaihhnawih, zuk leh hmuam, ei chi leh hmuam chi reng reng hi ram hruaitute, khawtlang hruatute leh kohhran hruaitute thlenga sim tura tan lak a pawimawh. A hruaitu bawr ten an sim a, vaihlo lam thil that lohzia hi kum 4 kum 5 an sawi a, anmahni'n entawn tlaka zawm bawk chuan, Mizoram hi 'Smoke Free Mizoram' a ni har lo ang. Mizorama natna tam tak, tun thlenga kan buaipui em em cancer te pawh a lo tlem phah ang a, cancer vanga mi tamtak lungngaihna leh tahna thleng thinte pawh a lo zia-awm phah thei ang. Sum leh pai nasa takin kan humhim (save) thei dawn bawk a ni. Tuna zuk leh hmuam ti mek nu leh pa, puitlingte hian an fate tih atan chuan duh an awm a rinawm loh a, chuti chunga an tilui tlat mai hian ngaihtuah a ti thui a. Fate hnenah a thatlohzia pawh hrilh thin mahse anmahni an fihlim miau loh avangin 'Chakai nufa kal inzirtir' an sawi ang maiin awmzia a nei dawn lo a ni. Zuk leh hmuam laka fihlim te chu an faiin an zahawm thin a. Kohhran a rawngbawltu Pastor leh Upa tam tak, zuk leh hmuam ti thin te hian kohhran a ti zahawmlo a ni tih an hriat a pawimawh a. Chutiang bawkin ram hruaitu 'public leader' te hi a hmahruaitu ah tang thei se, mipuite hian an zui ngei ang.