Aizawl September 4, 2022 : Nimin khan Ministry of Women & Child Development leh Ministry of Minority Affairs te changtu Union Cabinet Minister Smriti Zubin Irani chuan Lunglei lDC Conference Hall-ah Lunglei District Head of Offices te inkawmhona a neih pui a, Lunglei District-a Department hrang hrang hnuaia sawrkar laipui scheme (Centrally Sponsored Schemes) kalpui mek te dinhmun leh hmachhawp te an sawiho.

Smriti Zubin Irani chuan District hmasawnna chu Head of Office kalkhawmte kutah thui tak a innghat tih sawiin, sawrkar official-te chu mipui rawngbawltu an nih angin theihtawp chhuaha an hna thawk thin tur leh mahni hma zawn theuha hna chanpual leh tihtur awm te uluk leh taima taka thawk zel turin a chah. Hna kalpui danah District mipuite hmasawnna leh hamthatna dah pawimawh hmasa thin turin a chah bawk. 

Union minister chuan, mipuiten sawrkara an harsatna thlen theihna tur Public Grievance Cell din te, tar leh pianphunga rualbanlote tana camp buatsaih te, kuthnathawktute tan tangkai zawka scheme thenkhat thlunzawm (convergence) te ngaihpawimawh a tul tih sawiin, hna an thawhnaah harsatna leh mamawh an neih chuan tanpui turin sawrkar a inpeih reng tih kalkhawmte chu a chah bawk a ni.

Meeting-ah hian Lunglei Deputy Commissioner Kulothungan A chuan Lunglei District dinhmun tlangpui leh sawrkar hmalakna langsar zualte sawiin Presentation kaltlangin a tarlang a. Central scheme kaltlanga Department hrang hrangte hmalakna heng – tui hna humhalhna Amrit Sarovar; thingtlang kawng siam Pradhan Mantri Gram Sadak Yojana (PMGSY); thingtlang in tina tui connection pek chhuah Jal Jeevan Mission; thianghlimna leh bawlhhlawh sawngbawlna kawnga hmasawnna Swachh Bharat Mission; mitin banphaka health facilities chhawpchhuah National Health Mission; buh leh bal tharchhuah tihpun a intodelh National Food Security Mission; Women & Child Development hnuaia nu leh naupang te hamthatna leh hmasawnna ngaihtuah scheme hrang hrang; NH-54 leh NH-302 kawng laih mek  te chu zirchian leh sawiho a ni.