ZALEN July 20, 2023 : Mizo Hmeichhe Insuihkhawm Pawl (MHIP) chuan Manipur buaina kawihhnawihah tunhnaia video social media-a darh chungchangah thuchhuah an siam a, an unaute thil tawn rapthlak tak chu an hrethiam thei lo a, an thinlung a nat bakah an tahpui thu an thuchhuahah tarlan a ni.

MHIP chuan, "He video avang hian keini Mizote chauh ni lo, hnâm dangte pawhin rapthlak an tiin, nasa takin an dem a ni. He video hi May 4, 2023 a Phainom khua, Kangpokpi District, Manipur a thil thleng a ni a. Hemi ni hian Phainom khua hi Meitei hovin an rûn a, an in leh lo an halsak vek bawk a ni," tiin an tarlang a.

An thuchhuahin  a tarlan danin khua an halsakte hi a thei thei hmun him lam panin, a then Police Station-ah an tlan lut a, Police ten hmun him lama hruai an tumna lamah Meitei mipuiten lo dangin engemawzat chu Police kut atang hian Meiteite hian hnukchhuakin an sawisa ta a. Hmeichhiat te zahawmna ti bawrh bangin saruak vekin an khalhin an khal bakah an pawngsual rawn zui nghal bawk. Manipur buainaah hian tuna video viral bakah hmeichhiate nasa taka pawngsual leh an zahawmna tihchhiat sak an nia an ngaih thu tarlan a ni.

MHIP General Headquarters chuan, "Kan unaute thil tawn rapthlak tak hi kan hrethiam thei lo a, kan thinlung a na a, kan tap a ni. Kan unaute thlavang hauh hian theihtawp kan chhuah dawn a, kan theihna apiangah hma lak zel kan tum dawn a ni. Zoram puma kan hmeichhiat pui, kan rawngbawl pui zawng zawngte kan unaute tana tawngtai zel tur leh chhawmdawlna theihtawpa lo kalpui zel turin ka ngen tak meuh che u a ni," an ti.