Aizawl April 4, 2022 : Information & Public Relations Minister Lalruatkima chuan Social Media a thudik tawk lo leh Chanchinthar rintlak tawklo thehdarh tam lutuk thin chu ngaimawhawm a tih thu a sawi.

Vawiin khan Information and Public Relations (IPR) Minister Lalruatkima chuan a pisa ah MJA General Headquarters hruaitu tharte léngah a sawm a; journalist-te leh IPR department kaihhnawih thil chi hrang hrang sawiho na an nei. IPR Minister chuan Social media kan hmandan ah kan society tana la tha lo tur khawpa hmansualna a tam tih sawiin Youtube kaltlang te in Mizotawng hmang dik mang lo a, thu thehdarh a tam a,  Social Media ah keimahni nihna dik tak pholang ngam tak tak mang si lo a, mi dik lohna emaw, thuthang dik tawk lo vawrh darh a tam thin lutuk chu khawtlang (society) inrelbawl zelna turah thil tha lo zawk a hring thei tih a sawi a, "Kan fimhur thar a tul hle a ni," a ti. 

IPR Minister Lalruatkima chuan, MJA golden jubilee lawmna leh General Conference tluang taka neih a ni chu lawmawm a tih thu sawiin, "Hruaitu thar te kan nei a, duhsakna kan hlan che u. Thuràwn inpe tawnin i infinchhuah zel ang u," a ti. Lalruatkima chuan, press enclave an la bawhzui zel rualin, hmalakna a chak thei lo tih a sawi a; Journalist Pension Scheme a kal chho zel tih sawiin, "A la kal zel ang a, file a la kal mek. Tihhlawhtlin hun kan nghakhlel a, a tul ang zelin hmalak kan tum," a ti. MJA member-te tan press tour leh Parliament training buatsaih chungchang leh advertisement rate chungchangte a sawi lang bawk.

MJA Gen.Hqrs President C Lalrambuatsaiha pawhin thu sawiin, press mite leh IPR department thawhhona a tha tih a sawi a, "Hetianga thawhhona tha hi state dangah a awm kher lo mai thei. MJA-te kawng tinréngah min duhsak thin a, kan lawm hle a ni," a ti a; advertisement, press tour, Journalist Welfare Fund chungchangte a sawi lang bawk a ni.