Aizawl; Department of Information & Communication Technology (ICT) a mithiamte chuan, Mizo ten social media ah sum kan sen nasat tawh thu leh social media chu mipat hmeichhiatna kaihhnawih a sum hmuhna atan hman an intih hmuh mek nia a lan thu an sawi.

ICT department a Informatics officer Lalengzualan ZALEN an hrilh danin, thalaiten mipat hmeichhiatna kaihnawih (sex related) a sum hmuhna atan social media hman an intihhmuh tan nia a lan thu sawiin, twitter leh IG velah, mahni video leh thlalak zuar ang chite an awm tam tawh nia a lan thu a sawi.

Zirlaite leh kohhran thalaite hnen a zirtirna an pek tam ber thin chu, social media hrang hranga hun leh tha, sum leh pai sen tam lutuk chungchang niin, hmang lo tura intih ngawt chi a nih tawh loh rualin, a hman tangkai dan erawh zawng hram hram tura an inzirtir thin thu a sawi bawk.

"Khawpui chauh pawh ni loin, thingtlang lamah pawh social media ah sum kan seng nasa tawh a, a bikin Youtube ah hun kan khawhral nasa khawp mai," Informatics officer chuan tiin, "Kum 40 chung lam, Pavalai rual zingah social media hman inzirtir a ngai nasa niin a lang," a ti bawk.
 
Social media chungchangah a tlangpuiin engatan nge kan hman dawn tih pawh inhre lo a hun khawhral an tam thu leh chu chu a bik takin zirlaite tan nakin zela an career nghawng tur a nih thu te, rilru leh taksa thlenga nghawng tha lo nei thei tur a nih thu te sawi bawkin, inzirtirna a that loh chuan nakin zela harsatna nasa zawk awm thei tur a nih thute a sawi.