Aizawl July 27, 2024 : ZPM Thalai chuan thuchhuah siamin tun hnaia social media lama minister leh speaker bangla chei that chungchanga thu dik chanve hmanga sawrkar beihna viral mek hi sawrkâr hmasa mawng hlîmna-ah an ngai tih an tarlang.

ZPM Thalai chuan RTI chhanna ang hian Minister pathum leh Speaker Bangla chei that nan cheng nuai sawmhnih pasarih leh singli hman a ni a, en mai chuan tam tak anga lang ni mah se, Bângla luah hmasatute hian sawrkâr Bângla-te an mahni ta anga an enkawl loh avangin a chhe hlawm hle a, chei that nasat a ngai em em a, hetiang zat sum sen a ni hi a tlem zawk hle a ni. Minister Bangla-te hi a chhûng chul rup a, repair ngai tam tak awm bawkin, hengte hi siam that vek a ni bawk, an ti.

"Bangla bul vel a hnimin a hnawk em em a, a chhung leh a bul vel chei that nan ringawt pawh thla khat chuang hun hman niin, a chhûnga bungraw awm tamtak hi hman zui tlak loh a awm nual a, A chhung bungraw awm zawng zawng parda lam thlengin lei vek a ngai a ni. Heti khawpa bangla chei that ngaite tha taka chei a ni-leh a chhunga bungraw awm zawng zawng lei vek a nih hnuah pawh cheng nuai sawmhnih pasarih leh singli chauh sen a nih hi a tlem hle zawk a ni," ZPM Thalai chuan an ti.

"Kan minister te hian term dang lo awm turah vanduaiin lo minister lo pawh ni se, heng an bungraw awmsa hi minister dang Bangla luahtu turte tan an chhawm leh nghal vek thei dawn a, an mimal tana bungraw lei pakhatmah a awm lo a, bangla luah hmasatute ang lo takin an in lama hman turin an la ve dawn lo a ni," an ti bawk.