Tuikum Bial Zirlai Pawl (TBZP) chuan vawiin April 29, 2023 Inrinni khan MZP Conference Hall-ah Assembly an hmang a, hruaitu thar thlanna an nei ngal bawk. He hun hi Social Welfare minister Er. Lalrinawma chuan khuallian niin a hmanpui. 

Minister chuan thusawiin, "Chawimawina dawn hi a hlu a, a hlawha hlawh chhuah a nih avangin a ropui hle a ni. Vawiina zirlai leh zirlai hruaitu lo kal khawmte pawh hian chawimawina dawn tum ula, chumi tur chuan thawkrim rawh u. Chawimawina dawn hi a awlsam lo a, mi hlawhtlingte tan chauh a ni," tiin a sawi.

Khuallian hian zirlai kalkhawmte chu zirna kawngah theih tawp chhuah tur leh hna zawn kawngah pawh rim taka bei turin a fuih bawk. Eng hna pawh taima leh rinawm taka thawh a pawimawh tih sawiin, hlawhtling tur chuan thawhrimna leh dawh thei taka nghah hram hram a pawimawh tih a sawi bawk. 

Tuikum Bial Zirlai Pawl hi kum 2013 khan din a ni a,  kumin hi a kum 10-na a ni. Tuikum Constituency-ah hian khaw 19 an awm a, khaw tinah hian zirlai pawl an ding deuh vek bawk. TBZP hruaitu thar thlan chhuahte leh hruaitu kal chhuakte hian charge an inhlan nghal bawk. 

Vawiin Assembly-ah hian khuallian leh inthlan buaipuitute nen mi 32 an tel.  Programme hi B. Lalrohlua, Asst. Secretary-in a kaihruai a; Gen. Secretary B.Lallawmkima hnen atangin report ngaihthlak a ni. President Pu Krosthanga pawhin thusawina hun neiin, chawhnu lamah hruaitu thar thlanna an nei nghal a ni.