Aizawl August 2, 2022 : Kolasib-a Mizoram sawrkar Soil Department ram, Khuangpuilam VC huam chhunga MNF party te'n mimal ram atan theh an tum nia an hriat chu ZPM thalai chuan pawi an tih thu vawiin khan Kolsaib chanchinthat lakhawmtute hmaah an sawi. Sawrkar ram, dan pal zuta party mal hamthatna leh campaign-a vote zawnna atan hman chu ZPM thalai Kolasib Block chuan an phal loh thu leh a tawp thlenga dodal an tum. 

ZPM Thalai Kolasib Block chuan, In hmun lo ram nei lo, mamawhtu te tana In hmun pek chu an dodal loh thu leh dan hnuaiah sawrkar dan awmsa kalphung pangngai takin House Site Selection Advisory Board (HSSAB) kaltlangin In hmun mamawh te tana dilna hun siamin, tlangzarh ni rawh se tih chu an dinna a nih thu an sawi bawk. "MNF party te'n an mi leh sa uchuak taka induhsakna atana sawrkar ram an theh ve ngawt mai hi ZPM thalai Kolasib Block chuan kan dodal tlat a ni," an ti. 

ZPM Thalai Kolasib Block chuan, "MNF party worker te'n an nawm an maka an mimal ram atana an lo theh ngawt mai hi, thil kalphung lo lutuk leh zahthlak tak a ni a. Kolasib hma hun a ngaihtuah loh thlak a, khawtlang a hmangaih loh thlak hle a ni," tiin, "Rulling party an nih avanga dan pal zuta hma an la ta mai hi kan dem hle a ni. Dan ngaih pawimawhlohna leh palzutna ramah rorelna tha a awm ngailo tih hi MNF party hian hre nawn leh rawh se," an ti. 

ZPM Thalai chuan Bialtu MLA K.Lalrinliana chu Politics khelh nan sawrkar ram hmang lo tur leh Khuangpuilam VC huam chhunga Soil Department ram mimal ram tana theh an tum mekna chu titawp tura hma la turin an ti bawk.