Aizawl; Mizoram sawrkar sum harsatna thleng mek vangin, sawrkar hnathawkte August, 2022 hlawh lak hun a tlai leh dawn nia thudawn a ni a, hetih lai hian hlawh buaipuitu, drawing and disbursing officer (DDO)-te chuan hlawh tur treasury-ah an thehlut mek nia thudawn a ni.

Finance department hotute hnen atanga ZALEN thudawn danin, thla dang aia sawrkar hnathawkten July thla hlawh an lak tlai hnuah August thla hlawh pawh sum harsatna vangin an la tlai leh dawn a, hlawh pek theih hun tur hi sawi mai theih a la ni lo.

A ngheta sawrkar hna thawk leh a nghet loa thawkte hlawh lak hun a inang lo a, a nghet loa thawk, muster roll, workcharge leh provisional employee te chuan ni 20 chho vel atangin hlawh an la thin a, a nghet loa thawkte chu August 5 atang khan July thla hlawh pek an lo ni tawh a, pension leh a nghet a thawkte pawh August 10 khan pek an lo ni tawh.

Finance leh Treasury official-te sawi danin Mizoram sawrkar hnathawkte hlawh atan thla khatah Rs. vbc. 330 vel mamawh thin a ni.

Finance department chuan tun hnai, August 4 khan centrally sponsored scheme (CSS) sum pek chhuah a nih avanga Mizoram sawrkar sum dinhmun that loh chungchang sawifiahna a lo tichhuak tawh a, chutah chuan sum harsatna intan dan tar langin, kum 2019-20 tawp lam atanga 2020-21 chhunga sum dawn tura ngaih dawn loh tam tak a awm tih tar langin, a hlawm lian chin ringawt pawh Rs. vbc. 2,632.58 a nih thu an tar lang.

“Hemi nghawng hi kan la tuar mek a, heng hun lai hi Covid hri hluar vanglai a ni a, central atangin sum faia tanpuinate kan dawng ve bawk a; mahse, Rs. vbc. 100 pawh a tling tha thum lo,” ti bawkin, Covid vanga tanpuina dawn chu Mizoramin sum a hmuh tur a dawn tak si loh nena khaikhinin a beitham hle niin an tar lang bawk.