Aizawl September 5, 2024 : ZPM Thalai chuan vawiin khan thuthar thehdarhtute an kawm a, he hunah hian Speaker Bungalow cheithat, bungraw lei chhan leh Speaker motor lei chhan te an sawi a, tul vang leh loh theih loh vang niin an sawi.

Speaker Bungalow cheithat leh bungraw lei chungchangah ZPM Thalai chuan loh theih loh avanga lei an nih thu an sawi a, Bungalow-a bungrua report an hmuh atanga a lan danin luah luhna chi a ni lo an ti a, Speaker luh hma hian Khum, Dining table, Chair, Fridge leh bungraw nepnawi tlem bak a awm lo an ti a, PWD-in Furnishing atan hian bungrua an sanction phah mai a ni an ti.

Speaker motor thar neih chungchang an sawi dan chuan official lamin chuan Speaker hian office a luah tirh atangin lirthei lei tul tihna leh rawtna an thlen a, mahse, sawrkarin inrenchem kum a puan avangin tul a tih loh thu a lo hrilh a, thla 4 chu he motor hi a hmang a, amaherawhchu Opposition Leader motor kawl a chiangkuan tak loh avangin motor thar hi lei hi a nih thu an sawi.

VIP motor an indaih tak lovah chuan a thar hi lak a ni ta a, kalphungah order of preference in Speaker chu 1st priority a pek angin motor thar chu a chang ta a ni a, a kawllai chu Opposition Leader-ah a tawlh thla ve thung a, motor thar hi a tum vang reng ni lo in a tulna in a urlawk vanga lak a ni, an ti.