Aizawl June 15, 2023 : India rama National Legislators' Conference (NLC) hmasa ber chu vawiin atangin Mumbai-ah tan a ni a. Mizoram atangin Assembly Speaker Lalrinliana Sailo hovin MLA 6 bakah Official te an tel. Conference-ah hian Lok Sabha Speaker lo ni tawh te, India ram state Assembly Speaker leh Council Chairman te, central leh state sawrkar mi pawimawh te an tel a. MIT-School of Government (SOG) buatsaih a ni.

National Legislator Conference hawnna hi MIT- SOG Founder leh CEO ni bawk, Rahul V. Karad-an a kaihruai a. Conference thlengtu Maharashtra sawrkar aiawhin Assembly Speaker Rahul Narwekar-an state hrang hrang atanga conference hmang tura kal khawmte lawmna thu sawiin NlC vawi khatna Mumbai-a buatsaih a ni chu lawmawm a tih thu a sawi

NLC hi Jio World Convention Centre, Bandra ah ni 3 chhung neih chhunzawm a ni dawn a. Hetah hian India ram state hrang hrang atanga legislator rual ten mahni ram leh ziarang inhriat tawnna te, ngaihdan thawh khawm leh sawihona hun te, democracy than zelna tur atana pawimawh te, rorelna tha nei tura legislator te hmalakna tur te, zirna lama hmasawnna rualkhai zawka kalpui dan tur te, sum leh pai dinhmun thanna atana hmalakna tur pawimawh leh area hrang hranga hmasawnna turte an sawiho ang.

MIT mithiam rualte nen group hrang hrangah inthen darhin ngaihdan inhrilh tawnna te, state kalphung tha zirhona leh sawihona in hun an hmang dawn a ni. Conference ah hian India ram state hrang hrang leh Commonwealth ram hrang hrang atangin Assembly Speaker leh Chairman te, Legislators te leh official te sawm an ni. 

Mizoram atangin Speaker Lalrinliana Sailo leh political party hrang hrang aiawh MLA 6 - K.T Rokhaw, Nihar Kanti Chakma, Er. H. Lalzirliana, Dr. K. Pachhunga, Dr. Vanlalthlana leh B.D Chakma te an tel a. Official aiawhin Lalhmahruaia Zote, Commissioner & Secretary leh I&PR Jt. Director PB. Lianthangpuii bakah Assembly Secretariat atangin officer leh staff 4 an tel bawk a ni.