Aizawl: Sports & Youth Services Minister Robert Romawia Royte chuan nimin zing dar 7:30 khan Aizawl khawpui chhunga zirna in hrang hranga NSS volunteer ten Fit India Movement hmalakna kal zel atana Walkathon an neih a hmanpui.

Walkathon hi Aizawl khawpui chhung College leh Higher Secondary School hrang hrang 13 atangin NSS Programme Officer leh Volunteer 500 chuang zet ten neiin Vanapa Hall atangin Chanmari kawn thleng an nei a ni.

Walkathon Flag Off Programme, Vanapa Hall kawta neih hi Dr Zirlianngura, State NSS Officer cum Deputy Secretary NSS Cell Mizoram chuan a kaihruai a. NSS volunteer, POs leh Officials ten Fit India Pledge thutiam an nei. Chumi hnuah khuallian Robert Romawia Royte chuan Fit India movement lo chhuah dan, pawimawhzia leh hemi programme tihhlawhtlin nana NSS Volunteer-ten walkathon an nei thei chu lawmawm a tih thu a sawi.

Fit India Movement Walkathon hi Aizawl-ah chauh ni lovin, Mizoram chhunga District capital zawng zawngah nimin zing khan NSS volunteer ten an hmang vek a ni.