Aizawl: Sports Minister Robert Romawia Royte chuan March 17 & 18,2022 khan Mamit district hmun hrang hranga Sports & Youth Services Deptt. hnathawhte a endik a, Assam ramria Mizoram Police Camp 2 tlawhin pawisa leh TV a pe.

Minister hian Mamit khawpuia Multipurpose Indoor Stadium Rs 1250/- lakh senga sak mek te, Mamit Tourist Lodge behchhana Hostel sak belh dan tur te Tourism Department hotute nen an en a. Mamit daia Mamit Sports School Rs 3400 kakh senga sak mek enin Mamit District Sports Complex Rs 4400/- lakh senga sak tan mek chu a tlawh bawk a ni. 

Minister Robert Romawia Royte chuan Laldenga Football Ground Tuidama sak mek pawh tlawhin Contractor ten Phullem leh Drainboard pawh Tuidam a thlen tawh thu leh May 2022-ah field hnathawh hi zawh hman tum a nih thu Minister hi an lo hrilh a ni. Sports Minister hian Kawrthah Residential Sports School Rs 3300/- lakh senga sak mek pawh a hmunah a tlawh a, he school behchhana Synthetic Football Ground siam mek pawh a tlawh bawk. 

Robert Romawia Royte chuan Chief Minister Zoramthanga’n lung a lo phum tawhna ah te hmasawnna hna chak taka thawh vek a ni leh, thenkhat chu zawh mai tur a lo ni ta chu a lawmawm a tih thu a sawi a. Contractor thenkhat hnathawk muang deuh te erawh chu Covid dinhmun a ziaawm tawh avangin nasa lehzuala tan la turin a fuih a. Hna thawk chak theilo an awm chuan an chungah action lak zat zat a ni ang tiin hna quality thalo chu thiahtir leh zel an ni ang, a ti bawk.

Sport Minister hian Thinghlun rama Assam ramria Mizoram Police te Duty Camp a tlawh a, sipaiten TV an neih loh avangin TV lian leh sa leina turin Rs 30,000/- a pe a. Sipaite insawizawi na tura sports infrastructure siam nan Rs 30 lakh ruahman a ni tih a hrilh a. Thinghlun ramah hian Police 30 lai an awm a ni. Minister hian Assam ramri tho Mitdel lui Police Camp a tlawh bawk a, Police te ruai theh nan Rs 30,000/- pein TV lian a pe bawk. Mitdel luiah pawh hian Police 30 zet an awm a ni.

Minister tawiawmtu Central YMA President R.Lalngheta pawhin thu sawiin sawrkarin ramri a ngai pawimawh a, theihtawp chhuaha Police te a hmuna a dah chu lawmawm tiin YMA pawhin ramri venhim a ngai pawimawh tak zet tih a sawi a. Police te huaisenna fakin ruihhlo laka fihlim a, an taksa sawizawi reng turin a fuih a ni.

Minister Robert Romawia Royte hi SEDP Board Vice Chairman & Ex-MLA TC Pachhunga leh official pawimawh dang ten an tawiawm a ni.