Aizawl: Sports Minister Robert Romawia Royte chuan nimin khan Kolasib khaw chhunga khelmual hrang hrang awm te tlawhin, tihchangtlun dan tur a hmunah a en a, Sports Stadium-ah hian FCS&CA Minister K.Lalrinliana leh Serlui bialtu MLA Lalrinsanga Ralte te nen thing an phun bawk.

Sports Minister Robert Romawia Royte chuan Regional Sports Training Centre, Saidan Football ground a phul phah mek chu tlawhin, FIFA in football ground awm dan a duan ang a a siam a nih thu sawiin, "FIFA certified football ground hman theih mai tur a peih fel tep a ni a, Mizo infiammi ten hei hi kan hman tangkai hle ka ring a ni," a ti. Minister chuan Regional Sports Training Centre-ah infiamna discipline hrang pathum tal awm thei tur a ruahmanna siam a nih thu a sawi a, Hmar Veng, Kolasiba Futsal khelmual sak dan tur a enpui nghal bawk a ni.