ZALEN August 18, 2025: Shillong, Meghalaya-a August 11 – 13 chhunga Assam Regiment laknaah Mizo thalai an chetha a, sports quota kaltlangin Mizo infiammi 12 an tling; midang pathumin medical review an nghak mek. Sipai pangngai (Agniveer) ah pawh Mizoram atangin mi 163 tling tawhin, mi 39-in medical review an nghak mek bawk a ni.

Sports & Youth Services Minister Pu Lalnghinglova Hmar leh Brigadier Vikas Rai Shandilya, Commandant, Assam Regimental Centre, Shillong te chu July ni 13, 2025 khan Aizawlah an inkawm a, Assam Regiment-a Mizoram in quota engemawzat a neih hman tangkai a nih tawk loh dan te an sawi dun. A bikin sports quota-a Mizoram atanga thalai thahnem zawk sipaia an luh dan tur ruahmanna an siam a ni.

Sports Minister leh Assam Regiment hotu inbiakna bawhzui hian Mizo Territorial Army Company, Aizawl chuan Mizoram atanga sipai intlar turte tan Aizawl-ah pre-recruitment training leh orientation a buatsaih a. Screening-ah hian intlar turte document leh hriselnate endik niin, infuihna leh hriattur pawimawh inhrilhhriatna hun hman a ni bawk. Inbuatsaihna hi Champhai South bialtu MLA Lt. Col. Clement Lalhmingthanga chuan a enpui a, ruahmanna a siamsak bawk.

Sports & Youth Services Department leh Mizoram State Sports Council kaltlangin Mizorama sports association hrang hrangte chu infiammi, sipaia tang theite zawng chhuaka an hming thehlut tura ngen leh hriattir an ni bawk. Sports quota bîkah hian kum dangah Mizorama atanga lut an awm ngai meuh lo a, kuminah infiammi 12 an tling tawh leh tlin belh thei an la awm zel chu lawmawm a tih thu Sports Minister chuan a sawi a, kum dangah pawh infiammite tana sipaia an luhna tur buaipui zel a nih tur thu a sawi bawk.

Sipai lak pangngaiah pawh screening leh inzirtirna mumal tak neih a nih avang hian kum dang aiin document fel lo leh thil hriatsual vanga buaina a tlem a. Nikumah Mizoram atanga mi 57 an tlin laiin, kuminah chuan mi 163 an tling tawh a, mi engemawzat tlin belh thei dinhmuna an la ding chu lawmawm an tih thu Sports Minister leh Champhai South MLA te chuan an sawi.

Kum dangah pawh huam zau lehzuala hma lak zel tha an tih thu an sawi bawk a, sipai laka thil ṭul leh bawhzui ngaite vawiin khan Sports Minister office-ah Lt Col Lalhmingthanga nen hian an sawi dun a ni.