Aizawl; Nimin, January ni 9 khan Lengteng bialtu, Sialkal Range Development Council (SRDC) chairman ni bawk, MLA L. Thangmawia, sorkar official leh MJA member thenkhatten Saitual - Saichal - NE Hliappui kawng siam hnathawh mek a hmunah an en.

Kawng ennaa hun hmanna hmunah thusawiin L. Thangmawia chuan Saitual - Saichal - NE Hliappui kawng km 34.33 laih hna chu MNF sorkar hmasa, 31.10.2006-ah NEC sum cheng nuai 3343.60 hmang a thawh tan a nih thu a sawi.

SRDC chairman L. Thangmawia sawi danin, hna thawh tan a nih atanga revised estimate siam hnuah Saitual - Saichal - NE Hliappui kawng siamna tur chu cheng nuai 4,097.25-ah a kai chho tawh.

Central sorkarin NH - 102B enkawl hna chu National Highway & Infrastructure Development Corporation Ltd (NHDCL) kuta dah turin ruahmanna thar a nei tih L. Thangmawia chuan sawi bawkin, 22.4.2020-ah Saitual - Saichal kawng, km 23.43 siamna turin cheng Vbc. 31.844 a ruahman fel thu te, hnathawktu turte thlan fel a hmalak tan a ni ta chu lawmawm a tih thu a sawi.

“He kawng blacktop hnathawktute hnenah a hun taka zo tur leh a nih dan tur ang taka tha a min thawhsak turin ka ngen a, hna kalpui a nih dan pawh kan thlir reng dawn a ni,” L. Thangmawia chuan a ti bawk.