Aizawl: Sialkal Range Development Council (SRDC) hnuaia Council meeting chuan SRDC huam chhunga School hrang hrang a zirtirtu indaih lohna khuaah te council pawisa atangin zirtirtu rawih nise an ti.

Zirtawpni khan Sialkal Range Development Council hi an chairman L. Thangmawia, MLA kaihhruainain SRDC Cell office, Venghluiah neih a ni a. Champhai North bialtu MLA leh Health & Family Welfare Board Vice Chairman Dr. ZR Thiamsanga pawh a tel a ni. Council Meeting-ah hian thu hrang hrang rel a ni a, SRDC Manual ennawnna leh siam that chungchang te pawh sawi a ni. Zirlai lehkha thiam thei, khawsak harsate tanpuina pek dan tur changchangte rel a ni a, kum danga lo tih tawh thin danin, heng zirlai harsate hi tanpuina pek leh ngei ni se tiin rel a ni.

Heng bakah hian SRDC huamchhunga cheng mipuite hriselna lam, a bik takin tunlai Covid-19 hrileng mek lak a mipui kan him leh zual theihna tura hmalak dante pawh rel tel a ni. Hmalak nghalna chi khat atan fumigator (Covid-19 hrik kahfaina khawl) leh a tui, disinfectant khaw tinah pek theuh an ni. Heng bakah hian, computer full set pakhat theuh Council area chhunga khaw tin tan pek nghal a ni.

SRDC hian tun dinhmunah khaw paruk huam mekin, Headquarters hi Mimbung a ni a, Cell Office Aizawl Venghlui-ah a nei a ni. Council member-te zingah hian a huam chhunga MLA pahnih Lengteng leh Champhai North te an tel a. 21-Lengteng (ST) A/C apiang chu SRDC Chairman a ni a, heng bakah hiang a huam chhung khaw tin VCP-te chu member an ni bawk a, SDO (Civil), Ngopa apiang chu Member Secretary an ni. SRDC Council meeting hi Village Council Election-2020 neih a nih hnua a vawi 1-na a ni a, member leh sawm bikte an kalkim thei vek a ni. Council term hi kum 2 a ni a, Vice chairman atan hian Mimbung VCP Thanghuliana chu lakluh nghal a ni bawk.