Aizawl: Nimin khan Central YMA hnuaia Health & Sanitation Sub-Committe buatsaihin Central YMA Hall, Tuikhuahtlang-ah Free Clinic buatsaih a ni a, he hunah hian Supply Reduction Service (SRS), CEC leh office staff te hriselna endiksak an ni.

He hun hi CYMA Asst. Secretary Peter Chhakchhuak, Health & Sanitation Sub-Committe in-charge ni bawk chuan a kaihruai a, sub-committe secretary David Lalnunkima chuan report a pe a, he hun hman a nih theih nana an hmalak dan te a sawi.

Sub-Committee Chiarman Dr. P.C. Lalramenga chuan ruihhlo do kawnga hmalatu pawi-mawh SRS te hriselna chu endiksak an phu tih a sawi a, anni bakah hian CEC member te leh office staff te chu doctor 5-in an endik.

He hun kaihruaitu Peter Chhakchhuak chuan SRS-te thawhrim dan te, ruihhlo do kawnga a thim a var pawh thlu lova a tulna hmun hmuna kal mai thin an nih thu a sawi a, chaw mumal pawha ei hman loh chang an ngah avangin an hriselna lam ngaihpawimawh sak an ngai tih sawi langin, CEC lamin an ngenna an tihlawhtlinsak avangin lawmthu a sawi.

CYMA lam atanga hmanpuitu, General Secreatry Lalhmachhuana pawhin hetiang hun an hmang thei hi lawmawm a tih thu a sawi rualin Health & Sanitation Sub-Committee chungah lawmthu a sawi a, an hriselna endiksaktu doctor-te pawh an hnathawhna apiangah tlawmngaih chhuah zel turin a ngen a, an hnathawh theuha YMA taka ti zel turin kalkhawmte a ngen.