Aizawl: Zanin hian Chelsea chuan Stamford Bridge-ah Liverpool an lo mikhual dawn a, he inkhelh tan hma hian he khelmuala Matthew Harding Stand-a awm reng tawh turin Mizo Chelsea Supporters Club (MCSC) banner chu tar a ni dawn.

Mizo Chelsea Supporters Club atanga ZALEN in thu a sawn danin zanin dar kua hian official-in he banner hi tar a ni ang. Chelsea khelmual Stamford Bridge-a supporters banner tar hi thil namai lo tak a nih thu, MCSC General Secretary Finga chuan a sawi a, hei hi hun rei tak atanga an hmalakna rah chhuah a nih thu a sawi.

MCSC hi charity lamah an theih ang tawin hma an la nasa hle a, Aizawl huam chhung bikah hian 'no plastic rally' tum thum nei tawhin, charity ride hi 2012 atang khan kum tin an huaihawt thin a, Chelsea in Cup an chawi apiangin blood donation an nei thin bawk. Heng bakah hian a khat tawkin Thrash tax challenge te an huaihawt thin bawk a ni.

Blood donation an neih thin hi club lama supporters club te lakah an hming that chhan a nih thu, Finga chuan a sawi a, hetiang ti thin hi ram dangah an ti ve ngai lo a, supporters club te chanchin an ziah lan ngai miah lohna Chelsea magazine lamah pawh a tum khat nan blood donation an neih lai hi tarlan a ni nghe nghe.

MCSC lama hian kum thar lamah chuan Mizoramah Chelsea aiawh ten an rawn tlawh ngei an rin thu an sawi a, nakum lam hian supporters club lama an hotulu ber John Scamell chuan India a rawn tlawh dawn a, hetah hian India rama Chelsea sopporters club pali zinga lian ber MCSC hi a rawn tlawh ngei tur thu an sawi bawk.