Aizawl : Labour, Employment, Skill Development & Entrepreneurship Department buatsaih ni hnih awh ‘KAWTCHHUAH – 2022: A start-up fair for Govt. I.T.I pass-outs’ chu ni 23.3.2022 khan Govt. ITI Campus-ah kharna neih a ni. 

He hawnna inkhawma khuallian, LESDE Department changtu Minister Lalchhandama Ralte chuan thusawiin, he programme hmanga awmze nei taka mithiamte hrualna hnuaia I.T.I zir chhuakte eizawnna tur atan sorkarin LESDE Department kaltlanga bultanna tur a buatsaih chu lawmawm a tih thu a sawi a. KAWTCHHUAH hmanga bul tan turte, eizawnna ngelnghet neihna atan chi pek in ni a, he chi hi in eizawnna tur zawn theuhah in tuh tiah a, thenawm khawvengte leh Zoram tan rah duhawm tak chhuah theuh turin intihsiakna a telte a fuih a ni. 

Kharna inkhawmah hian Lalramsanga Sailo, Secretary, LESDE chuan kalkhawmte lawmna thuchah sawiin, ITI pass chhuakte eizawnna leh an hmasawnna tura LESDE Department hmalakna a hmawr an bawk thei ta chu lawmawm a tih thu sawiin, Skill khawvel tilian a,  tichangtlung zel tura theih tawp chhuah turin kalkhawmte a chah bawk a ni. K.Lalhmingliana, Director, LESDE chuan kal-khawm te leh he hun a rawn telte chungah lawmthu sawiin kharna hun a hmang a ni. 

KAWTCHHUAH-2022 ah hian ti tha mi 21 thlan chhuah niin, heng thlanchhuahte hi tangka fai Rs. 50,000/- theuh an eizawnna bul tan nan hlan an ni a. Computer Operator & Programming Assistant (COPA), Wireman, Electronic Mechanic, Plumber, Baker & Confectioner, Cutting & Sewing, Welder leh Carpenter trade atang tein lawmman hi an dawng a. Heng thlanchhuahte hmalak chhunzawmnaah LESDE Department chuan uluk takin endikna a kalpui zui dawn a ni. He programme-ah hian intihsiakna a mithiam rawihte (Expert Panel) ten vawiin khan intihsiakna a telte Mentoring Session an neihpui bawk a, James LT Thanga, Associate Professor, Dept. Of Economics, Mizoram University, Mark Lalduhsaka, CEO, Angel Business Promoters of Mizoram leh  David R. Lalsawmtluanga, Proprietor, Liando Auto Works ten he hun hi an hmanpui a ni.