Aizawl: Dr. R. Lalthangliana, Minister, H&FW etc., chuan State Bank of India (SBI), Luangmual Branch chu nimin khan a hawng. Dr. Thangtea chuan Aizawl tlak lam tan thil hlu an nei thar chu lawmawm a tih thu a sawi a, State Bank of India chu a tam thei ang ber inzar pharh turin a ngen.

SBI, Luangmual Branch hawnna inkhawm buatsaihah khuallian Dr. R. Lalthangliana chuan, “Aizawl tlak lama cheng mipuite tana rohlu kan nei thar hi a lawmawm takzet a, banking services hrang hrang kaltlangin malsawmna a keng tel dawn a, mipuiten tangkai takin an chhawr dawn. Aizawl West mipuite lawmpuina a hlan a ni,” a ti.

Dr R. Lalthangliana chuan Aizawl tlak lam bial hi hmun pawimawh leh hulum a la ni deuh deuh a ti a, zirna in pawimawh tak takte pawh dah belh zel a nih tu thu sawiin, “Tunah hian Aizawl West College sawnna tur hmun pawh kan tifel leh tawh a, Aizawl tlak lam hi hmunhma a la that avangin hmasawnna hna lian tak tak pawh thawh a la nih zel a rinawm a, branch hrang hrang hawn belh a tul a ni,” a ti. State Bank of India chu Mizoram pumah a tam thei ang bera inzarpharh tura a duh thu leh a tul chuan Mizoram sawrkar pawhin theihtawp a chhuahpui hreh loh thu a sawi a ni.

Minister chuan Mizoramin COVID-19 a hmachhawnna kawnga State Bank of India-in nasa tak hna a thawhnaah lawmthu a sawi. “COVID-19 hripui vanga harsatna tawk chhungkuate chhawmdawlna tur ruahmanna an siam a, sawrkar laipuiah an bawhzui dawn a, he ruahmanna hnuaiah hian chhungkaw 50,000 tal tuam an tum a ni,” a ti.

LP Lalchangkima, Regional Manager, State Bank of India chuan Aizawl tlak lam tan Vaivakawn branch chiah an neih avangin mipuite a tuam zo tawh lo hle a, branch dang hawn tumin hma kan la reng a, Luangmual branch kan han hawng thei ta hian mipuite harsatna nasa takin a chhawk kan beisei  thu leh a tul anga branch dang hawng lehzel turin rilru pawh kan siam a ni, a ti. 

Bank chu a thawktute ta ni lovin mipuite ta a nih avangin mipuite service tha tak pe turin tan kan la sauh sauh a, harsatna leh lungawi lohna nei kan awm a nih chuan Regional Office ah pawh telephone hmangin engtik lai pawhin a thlen theih a ni a ti a. 

Sumdawng Loan pawh thla tin mi 10 hnenah tal pe chhuak tura tan la turin an branch zawng zawng an hrilh tih sawiin LP Lalchangkima chuan sumdawnna bul tan duh tan an inhawng hle tih a sawi a, heng bakah hian Agriculture loan leh loan dang chi hrang hrang mipuite tan an chhawpchhuak tih a sawi bawk a, sawrkar hnathawk lo tan pawh heng loan te hi a dil theih reng a, tumah an thliar hrang lo tih a sawi bawk a ni.

Banking service mizo thalaiten ngaihven se a duh thu sawiin Banking service examah mizo thalaite an tling tlem thin hi a pawi takzet a, hna tha tak a nih avangin mizo thalaiten ngaihven se a duh takzet tih a sawi a ni.

SBI Luangmual branch hawnnaa tel Deputy Govt. Chief Whip  Lalrintluanga Sailo leh Aizawl West-I bialtu MLA Zothantluangate te pawhin thu an sawi. Deputy Govt. Chief Whip Lalrintluanga Sailo chuan bank tel lovin khawvel sumdawnna leh hmasawnna a kal thei tawh lo a ni ber a, State Bank of India, Luangmual Branch hawn a ni ta chu a veng neitupa a nihna ang pawhin a lawm thu Luangmual leh a chhehvelah nasa takin hmasawnna a rawn thlen ngei ka beisei thu a sawi ve bawk.

Bialtu MLA  Zothantluanga pawhin a biak chhunga State bank of India in branch thar an hawng chu a lawm takzet tih sawiin kan bial tan ni chhinchhiahtlak a ni,a ti a. Aizawl West-I bial hi Aizawl khawpuia bial zawng zawng zinga mihring cheng tamna ber a nih bakah mihring pun chakna ber a nih avangin kan mamawh takzet a, State Bank of India hotute leh thawktu zawng zawngte chungah bial mipui aiawhin lawmthu ka sawi a ni, a ti.

State Bank of India, Luangmual Branch hi Mizorama SBI branch 46-na a ni a, Luangmual Chhangurkawnah a awm a ni.